اداکارہ پرینکا چوپڑا اپنے امریکی شوہر نک جونس اور اپنے سسرال والوں کےساتھ لندن میں ہولی کا جشن منا رہی ہیں۔ اداکارہ نے انسٹاگرام پر اپنے اس جشن کی کچھ تصویریں بھی شئر کی ہیں۔ واضح رہے کہ اداکارہ کام کے سلسلے میں گذشتہ چند روز سے لندن میں قیام کر رہی ہیں۔
پیر کی صبح پرینکا نے انسٹاگرام میں نک کے ساتھ ہولی کی کچھ رنگ برنگی تصویریں شیئر کی ہیں۔ اس پوسٹ کے ذریعہ اداکارہ نے اپنے 61.5 ملین فولورز کو ہولی کی مبارکباد پیش کرتے ہوئے کہا کہ ہولی کا تہوار ان کے پسندیدہ تہواروں میں سے ایک ہے۔
اداکارہ لکھتی ہیں 'ہولی، رنگوں کا تہوار میری پسندیدہ تہواروں میں سے ایک ہے۔ امید کرتی ہوں کہ ہم سب اپنے پیاروں کے ساتھ اس تہوار کو منا رہے ہیں، لیکن اپنے اپنے گھروں میں'۔
واضح رہے کہ گذشتہ برس اسی وقت پرینکا اپنے شوہر نک کے ساتھ بھارت میں ہی تھی اور انہوں نے ایشا امبانی کی ہولی پارٹی میں شرکت کی تھی۔ جہاں گذشتہ برس ہولی کے موقع پر پرینکا اور نک بالکل دیسی انداز میں نظر آرہے تھے وہیں، اس برس کے ہولی کے جشن کے موقع پر دونوں بالکل عام لباس میں نظر آئے، لیکن ان کے چہروں میں رنگوں سے کھیلنے کی خوشی صاف نظر آرہی تھی۔
وہیں، اگر پرینکا کے آئندہ پروجیکٹ کی بات کی جائے تو حال ہی میں پرینکا نے انکشاف کیا ہے کہ وہ بہت جلد ایک ہندی فلم میں نظر آنے والی ہیں۔