ہندی سنیما کے عظیم گلوکار کشور کمار آج بھی اپنے نغموں کی طرح ہر کے زبان اور دل میں زندہ ہیں۔
کشورکمار نے اپنی سحر انگیز آواز سے ہندی کے نغموں میں جیسے جان ڈال دی۔
فلمی دنیا میں کشور دا کے نام سے اپنی پہچان بنانے والے کشور کمار 4 اگست 1929 کو پیدا ہوئے، آج کشور کمار کی 90 ویں سالگرہ ہے۔
کشوردا، مدھیہ پردیش کے کھنڈوا میں ایک بنگالی خاندان میں پیدا ہوئے تھے۔
زندگی کے انجانے سفر سے بے حد محبت کرنے والے ہندی سنیما کے عظیم گلوکار کشور کمار کی پیدائش مدھیہ پردیش کے کھنڈوا میں 04 اگست 1929 کو ایک بنگالی خاندان میں ہوئی تھی۔
ان کے والد کا نام ایڈوکیٹ کنجی لال گانگولی تھا۔ بھائی بہنوں میں سب سے چھوٹے شرارتی کشور کمار گانگولی عرف کشور کمار کا رجحان بچپن سے ہی باپ کے پیشے وکالت کی طرف نہ ہوکر موسیقی کی جانب تھا۔
سہگل کے نغموں سے متاثر کشور کمار ہمیشہ ان کی ہی طرح گلوکار بننا چاہتے تھے، سہگل سے ملنے کی خواہش لے کر کشور کمار 18 برس کی عمر میں ممبئی پہنچے، لیکن ان کی خواہش پوری نہ ہوسکی۔
اس وقت ان کے بڑے بھائی اشوک کمار فلمی دنیا میں بطور اداکار اپنی شناخت بنا چکے تھے اور وہ چاہتے تھے کہ کشور کمار ہیرو کے طور پر اپنی شناخت بنائیں لیکن کشور کمار اداکاری کے بجائے گلوکار بننا چاہتے تھے۔
حالانکہ انہوں نے موسیقی کی ابتدائی تعلیم کبھی کسی سے حاصل نہیں کی تھی۔ بالی وڈ میں اشوک کمار کی شناخت کی وجہ سے کشور کمار کو بطور اداکار کام مل رہا تھا۔
اپنی خواہش کے باوجود انہوں نے اداکاری جاری رکھی تھی۔ جن فلموں میں وہ بطور آرٹسٹ کام کیا کرتے تھے انہیں اس فلم میں گانے کا بھی موقع مل جایا کرتا تھا۔
کشور کمار کی آواز سہگل سے کافی حد تک ملتی جلتی تھی۔ بطور گلوکار سب سے پہلے انہیں سنہ 1948 میں بامبے ٹاکیز کی فلم ضدی میں سہگل کے انداز میں ہی اداکار دیو آنند کے لیے 'مرنے کی دعائیں کیوں مانگوں' نغمہ گانے کا موقع ملا۔