پاکستان شوبز انڈسٹری کی معروف اداکارہ صبا قمر اور گلوکار بلال سعید کے خلاف گرفتاری کا وارنٹ جاری کر دیا گیا ہے۔ لاہور کے جوڈیشل مجسٹریٹ نے اداکارہ صبا قمر اور گلوکار بلال سعید کے خلاف قابل ضمانت گرفتاری وارنٹ ان کے مسلسل غیر حاضر ہونے پر جاری کیے ہیں۔
اداکارہ صبا قمر اور گلوکار بلال سعید پر مسجد میں ویڈیو شوٹ کرنے کے الزام میں مقدمہ زیرِ سماعت ہے۔ عدالت نے آئندہ سماعت کے لیے 6 اکتوبر کی تاریخ مقرر کی ہے۔
گذشتہ برس لاہور پولیس نے قمر اور سعید کے خلاف لاہور کی تاریخی مسجد وزیر خان کی بے حرمتی کے لیے قانون کی دفعات کے تحت مقدمہ درج کیا تھا۔ دفعہ 295 کے تحت درج کی گئی ایف آئی آر میں کہا گیا تھا کہ اداکارہ صبا قمر اور بلال سعید نے مسجد کا تقدس پامال کیا، لہٰذا ان دونوں کے خلاف کارروائی کی جائے۔
ایف آئی آر کے مطابق دونوں نے مسجد کے سامنے رقص کرتے ہوئے ایک ویڈیو بنائی تھی۔ پاکستانی عوام نے بھی اس واقعے پر ناراضگی کا اظہار کیا تھا۔
صوبہ پنجاب کی حکومت نے اس سلسلے میں دو اعلیٰ عہدیداروں کو برطرف بھی کیا تھا۔ قمر اور سعید نے سوشل میڈیا پر تنقید کا نشانہ بننے کے بعد معافی بھی مانگی تھی۔
