عالیہ بھٹ نے اپنا پروڈکشن ہاؤس 'ایٹرنل سن شائن پروڈکشن' لانچ کیا ہے۔انسٹاگرام میں انہوں نے اپنے پروڈکشن ہاؤس کے لوگو کو پوسٹ کرنے کے ساتھ، اس پروڈکشن کے بینر تلے بننے والی پہلی فلم 'ڈارلنگس' کا بھی اعلان کیا۔
انسٹاگرام میں انہوں نے اتوار کے روز لکھا کہ '' مجھے اپنے پروڈکشن ایٹرنل سن شائن کے بارے میں اعلان کرتے ہوئے بے حد خوشی محسوس ہورہی ہے۔چلو آپ کو کہانیوں سے روبرو کرواتے ہیں اچھے اور خوشی والی کہانیوں سے، حقیقی اور لازوال کہانیوں سے۔''
اپنے بینر کے بارے میں اعلان کے چند ہی منٹ بعد عالیہ نے بطور پروڈیوسر اپنی پہلی فلم کی خبروں کو سانجھا کر اپنے مداحوں کو خوش کردیا ہے۔
عالیہ نے اپنی اس فلم ڈارلنگس کے ٹائٹل لوگو کا ویڈیو شیئر کرتے ہوئے پوسٹ کیا اور لکھا' یہ بہت خاص ہے۔بطور پروڈیوسر پہلی فلم ڈارلنگس، جو میرے پروڈکشن ہاؤس ایٹرنل سن شائن اور میرے پسندیدہ انسان شاہ رخ خان کی پروڈکشن ہاؤس ریڈ چیلیز انٹرٹینمنٹ کے بینر تلے بننے والی ہے۔اس فلم میں شیفالی شاہ، وجئے ورما اور روشن میتھیو نظر آنے والےہیں اور اس کی ہدایتکاری جسمیت کریں گے۔
واضح رہے کہ سنہ 2019 سے عالیہ کے پروڈکشن ہاؤس کے بارے میں خبریں سامنے آرہی تھی لیکن اس کے بارے میں باضابطہ طور پر اعلان نہیں کیا گیا تھا۔عالیہ جلد ہی فلمساز سنجے لیلا بھنسالی کی فلم گنگو بائی کٹھیاواڑی میں نظر آئیں گی اور آئندہ کچھ مہینوں میں وہ برہمسترا، آر آر آر اور ڈارلنگس میں نظر آئیں گی۔