ممبئی سے متصل شہر تھانے کے واگلے اسٹیٹ میں ایک انسانیت سوز واقعہ پیش آیا ہے جہاں وکی نامی ایک پیشہ ور مجرم نے ایک نوجوان کو برہنہ کرکے نہ صرف پورے علاقے میں گھمایا بلکہ اس کی ویڈیو بھی بنائی اور تقریباً ایک ہفتہ بعد اس ویڈیو کو سوشل میڈیا پر وائرل بھی کردیا۔
ویڈیو وائرل ہونے کے آٹھ دن بعد پولیس حرکت میں آئی اور مقدمہ درج کر دو ملزمین کو گرفتار کیا جبکہ اس معاملے میں ملوث دیگر تین ملزمین فرار ہیں۔
اس ویڈیو کے وائرل ہونے کے بعد واگلے اسٹیٹ پولیس حرکت میں تو آئی لیکن پولیس کی جانب سے ابھی تک کوئی ٹھوس قدم نہیں اٹھایا گیا ہے جس کیی وجہ سے علاقے کے لوگوں میں زبردست ناراضگی پائی جارہی ہے۔
اس تعلق سے مقامی لوگوں کا کہنا ہے کہ مذکورہ نوجوان اس واقعہ کے بعد سخت صدمے میں ہے اور کسی سے مل جل نہیں رہا بلکہ اس واقعہ کے بعد سے اسے گھر کے باہر بھی نہیں دیکھا گیا اور نہ متاثر نوجوان نے پولیس میں اس نے شکایت درج کرائی۔
پولیس کا کہنا ہے کہ جہاں واقعہ پیش آیا وہ علاقہ چونکہ کنٹمینٹ زون میں آتا ہے اس لیے وارداے کے دوران کوئی بھی شخص اس نوجوان کی مدد کرنے نہیں آیا لیکن اب ملزمین کی شناخت کر لی گئی ہے اور جلد ہی انھیں گرفتار کرلیا جائے گا۔