بیجنگ: چین کے بیجنگ کے فینگتائی ضلع کے ایک اسپتال میں زبردست آگ لگنے سے کم از کم 21 افراد کے ہلاک ہونے کی تصدیق ہوئی ہے۔ یہ اطلاع ڈسٹرکٹ فائر اینڈ ریسکیو کے محکمہ نے دی۔ محکمہ کے ذرائع نے بتایا کہ فائر فائٹرز کو منگل کی دوپہر 12:57 بجے بیجنگ چانگ فینگ ہسپتال کی عمارت میں آگ لگنے کی اطلاع ملی ۔ آگ 1 بجکر 33 منٹ پر بجھا دی گئی۔ بتایا جاتا ہے کہ آگ اتنی تیزی سے پھیلی کہ اس نے اسپتال کے مشرقی حصے کو اپنی زد میں لے لیا۔ اس ونگ میں سنگین امراض میں مبتلا مریضوں کو داخل کر کے ان کا علاج کیا جاتا تھا۔ اس دوران 71 مریضوں کو بحفاظت باہر نکال لیا گیا۔ شام 6 بجے تک 21 افراد کی ہلاکت کی تصدیق ہو چکی تھی۔ واقعے کی وجوہات کی تحقیقات کی جارہی ہیں۔
آگ لگنے کی اطلاع ملتے ہی ہنگامی ٹیمیں بیجنگ کے چانگ فینگ ہسپتال میں جائے حادثہ پر پہنچ گئیں۔ ریسکیو آپریشن کے دوران 71 افراد کو بحفاظت نکال لیا گیا۔ ان میں سے کئی لوگ زخمی ہوئے، جنہیں دوسرے اسپتالوں میں داخل کرایا گیا ہے۔ واضح رہے دو روز قبل شرقی چین کے ژی جیانگ صوبے کے زنہوا شہر میں ایک فیکٹری کی عمارت میں آگ لگنے کا واقعہ پیش آیا تھا جس میں 11 افراد ہلاک ہو گئے تھے۔ بتا دیں کہ ووئی کاؤنٹی کے صنعتی علاقے میں ایک عمارت کی تیسری منزل پر آگ لگنے کے بعد کئی لوگ پھنس گئے۔ جس میں 11 افراد کی موت ہو گئی۔