Qatari PM Taliban Chief Secret Talks قطر کے وزیراعظم اور طالبان سربراہ کے درمیان خفیہ مذاکرات

میڈیا رپورٹ کے مطابق طالبان کے سپریم لیڈر ہبۃ اللہ اخوندزادہ اور قطر کے وزیراعظم محمد بن عبدالرحمن الثانی کے درمیان یہ خفیہ مذاکرات 12 مئی کو کابل میں ہوئی تھی۔

کابل: قطری وزیر اعظم نے رواں ماہ کے اوائل میں طالبان کے ساتھ خفیہ بات چیت کی تھی، جس میں طالبان کی جانب سے تقریباً دو سال قبل افغانستان پر قبضے کے بعد سے بین الاقوامی تنہائی کو ختم کرنے کی نئی کوشش کا اشارہ دیا گیا تھا۔ الجزیرہ کے مطابق یہ مذاکرات 12 مئی کو ہوئے تھے، جس میں طالبان کے سپریم لیڈر ہبۃ اللہ اخوندزادہ اور قطری وزیر اعظم محمد بن عبدالرحمن الثانی کے درمیان ملاقات بھی شامل تھی۔ تاہم میٹنگ کی کوئی تفصیلات یا سرکاری پریس ریلیز جاری نہیں کیا گیا تھا۔

قطر کی سرکاری خبر رساں ایجنسی کے مطابق وزیراعظم محمد بن عبدالرحمن الثانی کا دورہ کابل ملک کے نگران حکومت اور عالمی برادری کے درمیان تعلقات کو آسان بنانے اور افغانوں کے لیے سلامتی اور خوشحالی کے حصول کے لیے مختلف فریقوں کے ساتھ بات چیت کے لیے سیاسی کردار کے تناظر میں تھا۔ خبر رساں ادارے روئٹرز کے مطابق ایک سفارتی ذریعے نے بتایا کہ امریکی صدر جو بائیڈن کو بھی دونوں ممالک کے درمیان ہونے والی بات چیت کے بارے میں بریفنگ دی گئی تھی۔

قابل ذکر ہے کہ طالبان کے اقتدار میں واپسی کے بعد سے یہ پہلا موقع ہے جب کسی بین الاقوامی رہنما نے طالبان کے سپریم لیڈر ہبۃ اللہ سے ملاقات کی تھی۔ اس موقع پر دونوں رہنماؤں نے بہت سارے معاملات خاص طور پر سیکورٹی پر بات چیت کی۔ اس دورن امارت اسلامیہ افغانستان کے عالمی برادری کے ساتھ وعدے بھی سامنے رکھے گئے۔ کچھ طالبان عہدیداروں کے ساتھ بات چیت میں خواتین کے حقوق اور اسکولوں کو دوبارہ کھولنے کے بارے میں بھی بات چیت ہوئی۔