غزہ: قطر کی ثالثی میں چار روزہ جنگ بندی جمعہ کی صبح سے نافذ ہونے کے بعد شام کے وقت حماس نے معاہدے کے تحت 24 یرغمالیوں کو بھی رہا کر دیا ہے۔ اسرائیل اور حماس کے درمیان یرغمالیوں کے معاہدے کے ایک حصے کے طور پر 24 اسرائیلی یرغمالیوں کے پہلے گروپ کو بین الاقوامی کمیٹی برائے ریڈ کراس کے عملے کے حوالے کر دیا گیا ہے۔
قطری وزارت خارجہ کے ترجمان ماجد الانصاری نے ایکس پر ایک پوسٹ میں کہا کہ جنگ بندی کے معاہدے کے فریم ورک میں ریڈ کراس کو موصول ہونے والے 24 سویلین یرغمالیوں میں خواتین اور بچے بھی شامل ہیں۔ انھوں مزید کہا کہ ہم تصدیق کرتے ہیں کہ ریڈ کراس کو انسانی ہمدردی کے معاہدے کے تحت 24 شہری موصول ہوئے ہیں، متعدد تھائی شہریوں کو بھی رہا کر دیا گیا ہے اور وہ فی الحال ریڈ کراس کے ساتھ غزہ سے باہر جا رہے ہیں۔
قطری وزارت خارجہ کے ترجمان نے کہا کہ رہا ہونے والوں میں 13 اسرائیلی شہری شامل ہیں، جن میں سے کچھ کی دوہری شہریت ہے، اس کے علاوہ 10 تھائی شہری اور ایک فلپائنی شہری ہے۔ اس کے علاوہ ہم اسرائیلی جیلوں میں زیر حراست 39 خواتین اور بچوں کی رہائی کی بھی تصدیق کرتے ہیں اور اس طرح سے معاہدے کے پہلے دن کے عزم کو برقرار رکھا گیا ہے۔