Earthquake in Afghanistan: افغانستان میں تباہ کن زلزلے میں مرنے والوں کی تعداد 1150 ہوگئی

افغانستان میں تباہ کن زلزلے Earthquake in Afghanistan سے ہونے والی ہلاکتوں کی تعداد میں مسلسل اضافہ ہو رہا ہے۔ تازہ ترین اعداد و شمار کے مطابق ہلاکتوں کی تعداد 1,150 تک پہنچ گئی ہے جب کہ زخمیوں کی تعداد بھی 1,600 سے تجاوز کر گئی ہے۔

کابل: افغانستان میں طالبان کی زیر قیادت حکومت نے اعلان کیا ہے کہ اس ہفتے کے اوائل میں پکتیکا صوبے میں آنے والے 6.1 شدت کے تباہ کن زلزلے میں مرنے والوں کی تعداد 1150 ہو گئی ہے، جب کہ زخمیوں کی تعداد بھی 1,600 سے تجاوز کر گئی ہے۔ طلوع نیوز کی خبر کے مطابق، جمعرات کو ایک بیان میں، آفات سے نمٹنے والی ریاستی وزارت نے کہا کہ ایک ہزار سے زائد زخمیوں کی حالت تشویشناک ہے اور زخمیوں کی تعداد میں روز بروز اضافہ ہوتا جا رہا ہے، کیونکہ کچھ لوگ اب بھی ملبے کے نیچے دبے ہوئے ہیں۔

مقامی حکام اور پکتیکا کے رہائشیوں نے بتایا کہ زلزلے میں ایک ہزار سے زائد مکانات مکمل طور سے تباہ ہوگئے، جو کہ دو دہائیوں میں سب سے زیادہ ہلاکت خیز تصور کیا جارہا ہے۔ زلزلے کا مرکز خوست شہر سے 44 کلومیٹر دور تھا اور زلزلے کے جھٹکے پاکستان اور بھارت تک محسوس کیے گئے۔ متاثرہ علاقوں کے مکینوں کا یہ بھی کہنا ہے کہ ان کے پاس کھانے کے لیے کچھ نہیں ہے اور نہ کوئی ٹھکانہ۔ایک رہائشی نے طلوع نیوز کو بتایا، "لوگوں کے پاس خیمے نہیں، کھانا نہیں، لوگ باہر کھلے آسمان کے نیچے رہنے پر مجبور ہیں، ہمیں ہر چیز کی ضرورت ہے۔وہ انسانی ہمدردی کے اداروں اور طالبان حکومت سے بھی فوری مدد فراہم کرنے کی اپیل کر رہے ہیں۔

بی بی سی کی ایک رپورٹ میں کہا گیا ہے کہ افغان اور بین الاقوامی امدادی ادارے نقصانات کا اندازہ لگا رہے ہیں اور سامان کی فراہمی کر رہے ہیں، لیکن یہ ایک بڑا بحران ہے کیونکہ یہ ملک پہلے سے سنگین انسانی صورتحال سے دوچار ہے۔ اقوام متحدہ، جو متاثرین کی مدد بھی کر رہی ہے، ہیضے کی ممکنہ وبا پھیلنے کے خطرے سے بھی خبردار کر رہی ہے۔حکومت نے اعلان کیا ہے کہ وہ متاثرین کے لواحقین کے لیے ایک لاکھ اور زخمیوں کے لیے 50،000 ادا کرے گی۔

مقامی ریڈ کریسنٹ اور ورلڈ فوڈ پروگرام جیسی امدادی تنظیموں نے سب سے زیادہ کمزور خاندانوں کو خوراک اور دیگر ہنگامی ضروریات جیسے خیموں اور سونے کے لیے چٹائیاں صوبہ پکتیکا اور پڑوسی صوبہ خوست میں پہنچا رہے ہیں۔