برطانیہ: کنگ چارلس سوم کی سرکاری سالگرہ سے قبل لندن میں پریڈ ریہرسل کے دوران کم از کم تین برطانوی شاہی محافظ سخت گرمی کی وجہ سے زمین پر گرگئے، کیونکہ درجہ حرارت 30 ڈگری سیلسیس کے قریب پہنچ گیا تھا۔ فوجیوں نے لندن کی 30 ڈگری سیلسیس گرمی میں اونی یونیفارم اور ریچھ کی کھال کی ٹوپیاں پہن رکھی تھیں۔
شاہی محافظ جس فوجی پریڈ کے دوران بے ہوش ہوئے تھے اس پریڈ کو 'کرنل ریویو' کے نام سے بھی جانا جاتا ہے۔ یہ تقریب ٹروپنگ دی کلر کی ریہرسل تھی۔ ٹروپنگ دی کلر ایک سالانہ فوجی پریڈ ہے جو ہر سال جون میں بادشاہ کی سرکاری سالگرہ کے موقع پر منعقد ہوتی ہے۔ کنگ چارلس سوم 17 جون کو ہونے والی تقریبات کا حصہ ہوں گے۔
یہ بھی پڑھیں:
شہزادہ ولیم نے بعد میں اس پریڈ میں حصہ لینے والے ہر سپاہی کا شکریہ ادا کیا۔ انہوں نے ٹویٹ کیا کہ بہت شکریہ، یہ سخت حالات تھے لیکن آپ سب نے بہت اچھا کام کیا۔ بعد ازاں پریڈ کی کئی تصاویر شیئر کرتے ہوئے انہوں نے لکھا کہ اس طرح کے ایونٹ میں جو محنت اور تیاری ہوتی ہے اس کا سہرا تمام لوگوں کو جاتا ہے خاص طور پر آج کے حالات میں۔
اس واقعہ پر غم کا اظہار کرتے ہوئے بہت سے لوگوں نے سوشل میڈیا پر اس طرح کے واقعات پر اعتراض کیا۔ 30 ڈگری سیلسیس میں گارڈز کی پریڈ پر سوشل میڈیا صارفین نے تشویش کا اظہار کیا اور انسانی حقوق سے متعلق سوالات اٹھائے۔ بی بی سی نیوز نے اطلاع دی ہے کہ یوکے ہیلتھ سیکیورٹی ایجنسی نے جنوبی انگلینڈ کے گرم موسم کے حوالے سے الرٹ جاری بھی کیا ہے۔
