Israeli Settlers Attack in West Bank فلسطین میں مسلح یہودی آبادکاروں کا حملہ، ایک فلسطینی جاں بحق اور متعدد زخمی

مقبوضہ مغربی کنارے کے ایک گاؤں میں مسلح یہودی آبادکاروں کے حملے میں ایک فلسطینی جاں بحق ہوگیا ہے۔ ایک دن قبل ہی مبینہ فلسطینی حملے میں چار اسرائیلی آبادکاروں کو ہلاک کر دیا گیا تھا۔

اقوام متحدہ: مقبوضہ مغربی کنارے میں یہودی آبادکاروں کے فلسطینیوں پر اجتماعی حملوں کے نتیجے میں ایک فلسطینی ہلاک اور 12 زخمی ہو گئے ہیں۔ اطلاع کے مطابق مغربی کنارے میں اسرائیل کے چھاپوں کی وجہ سے بڑھتی ہوئی کشیدگی کے دوران یہودی آبادکاروں نے بھی فلسطینیوں پر حملے کرنا شروع کر دیئے ہیں۔ اسرائیلی فوج کے زیرِ حفاظت یہودی آبادکاروں نے رملہ کے جوار میں واقع ترمسعیا میں فلسطینیوں کی بیسیوں گاڑیوں اور گھروں کو نذرِ آتش کر دیا۔ اس پر ردعمل کا مظاہرہ کرنے والے فلسطینی مکینوں اور یہودی آبادکاروں کے درمیان جھڑپ ہو گئی۔

فلسطین وزارت صحت کی جانب سے جاری کردہ تحریری بیان کے مطابق مسلح یہودی آبادکاروں کے ترمسعیا کے مکینوں پر حملے کے نتیجے میں 4 فلسطینی زخمی ہو گئے ہیں۔ زخمیوں کو رملّہ کے فلسطین طب مرکز میں منتقل کر دیا گیا ہے۔ سینے میں گولی لگنے سے شدید زخمی حالت میں ایک شخص کو ہسپتال لایا گیا جہاں اس کو تمام تر مداخلت کے باوجود بچایا نہیں جا سکا۔ مقامی ذرائع کے مطابق ہلاک ہونے والا فلسطینی 27 سالہ عمر ابوالقطین تھا۔ ترمسعیا کے بلدیہ میئر لافی شیلبی نے فلسطینی خبر رساں ایجنسی وفا کے لئے جاری کردہ بیان میں کہا ہے کہ 12 فلسطینی جوان گولیوں سے زخمی ہوئے اور بیسیوں افراد آنسو گیس سے متاثر ہوئے ہیں۔

شیلبی کے مطابق یہودی آبادکاروں کی طرف سے کئے گئے حملے میں 30 مکانات اور 60 گاڑیاں جلا دی گئی ہیں۔ اقوام متحدہ کے سیکرٹری جنرل انتونیو گٹیریئس نے بھی مقبوضہ فلسطین میں جاری تشدد اور جانی نقصان پر گہرے افسوس کا اظہار کیا ہے۔ اقوام متحدہ کے نائب ترجمان فرحان حق نے موضوع سے متعلق جاری کردہ تحریری بیان میں کہا ہے کہ گٹیریئس نے شہریوں کے خلاف ہر طرح کے تشدد اور دہشت گردانہ کاروائیوں کی مذّمت کی ہے۔ اس میں ہلاک کئے گئے 4 اسرائیلی اور مقبوضہ مغربی کنارے میں یہودی آباد کاروں کی طرف سے جلائے گئے اسکول، مکانات اور گاڑیاں بھی شامل ہیں۔

بیان کے مطابق سیکرٹری جنرل انتونیو گٹیریئس نے، 19 جون کو جنین میں اسرائیلی فوج کے حملے میں، 2 بچوں سمیت 6 فلسطینیوں کی ہلاکت کے واقعے پر بھی شدید افسوس کا اظہار کیا ہے۔ گٹیریئس نے کہا ہے کہ تناو میں کمی کرنا اور اسے شدت کی طرف مائل ہونے سے روکنا حیاتی اہمیت کا حامل ہے۔ اسرائیل کو ہر طرح کے پُر تشدد اقدام کے مقابل شہری عوام کے تحفظ کو یقینی بنانا چاہیے اور صرف مجرموں کو موردِ الزام ٹھہرانا چاہیے۔ (یو این آئی)