'نوبل پیس پرائز' کا خواہش مند نہیں: عمران خان

پاکستان کے وزیراعظم عمران خان نے کہا ہے کہ ’نوبل پیس پرائز‘ کی حقدار وہ شخصیت ہے جو کشمیری عوام کی خواہشات کے مطابق مسئلہ کشمیر حل کرے۔

عمران خان نے اپنے ٹویٹر پیغام میں لکھا کہ :' میں ’نوبل پیس پرائز‘ کا حقدار نہیں ہوں۔ اس کا اصل مستحق وہ ہے جو کشمیری عوام کی خواہشات کے مطابق مسئلہ کشمیر حل کرے اور بر صغیر میں ترقی اور امن و استحکام کے لیے راستہ ہموار کرے۔

واضح رہے کہ عمران خان کے بھارتی پائلٹ ابھینندن ورتمان کو رہا کرنے کے اقدام کے بعد ان کے ملک کے اعلی رہنماوں سمیت پوری دنیا سے ’نوبل پیس پرائز‘ کے لیے منتخب کیے جانے کی باتیں کہی جارہی ہیں۔

وزیراعظم عمران خان کو نوبل امن انعام دینے کے لیے پاکستانی اسمبلی میں قرارداد بھی پیش کی گئی ہے۔ اس میں کہا گیا ہے کہ عمران خان نے بھارت اور پاکستان کے درمیان کشیدگی کم کرنے کے لیے دانشمندانہ کردار ادا کیا۔