یمن میں اتحادی افواج کے حملے

سعودی عرب کی قیادت والی اتحادی افواج نے پیر کو شمالی یمن میں حوثی باغیوں کے ٹھکانوں کو نشانہ بنا کر فضائی حملے کیے۔سعودی عرب کی خبر رساں ایجنسی ایس پی اے نے یہ اطلاع دی۔

ایس پی اے کے مطابق اتحادی افواج کے جنگی طیاروں نے پیر کو یمن کے شمالی صوبہ صعدہ میں حوثی دہشت گردوں کے ٹھکانوں کو نشانہ بنا کر پانچ فضائی حملے کئے ۔ ان حملوں میں حوثی دہشت گردوں کی کئی کمانڈ پوسٹ تباہ ہو گئیں۔ اس کے علاوہ کئی دہشت گرد مارے گئے یا کئی دیگر زخمی ہو گئے۔

یہ حملے سعودی عرب کے تیل والے علاقے شیبہ پر کئے گئے حملے کے جواب میں کئے گئے ہیں ۔ حوثی دہشت گردوں نے ہفتے کے روز شیبہ آئل فیلڈ پر دھماکہ خیز مواد سے بھرے 10 ڈرون طیارے سے حملہ کر دیا تھا۔ جس کی وجہ سے شدید آگ لگ گئی تھی۔ تاہم اس حملے کی وجہ تیل برآمدات میں رکاوٹ پیدا نہیں ہوئی ہے۔

واضح رہے کہ یمن میں کئی سال سے صدر عبدالرب منصور ہادی کی قیادت والی سرکاری افواج اور حوثی دہشت گردوں کے درمیان لڑائی چل رہی ہے۔سعودی عرب کی قیادت والی اتحادی افواج مارچ 2015 سے ہی حوثی دہشت گردوں پر فضائی حملے کرتی آ رہی ہے ۔