مغربی کنارے میں آبادکاری چوکی کے خلاف فلسطینیوں کا مظاہرہ

قریب کے دیہات میں رہنے والے فلسطینیوں کا کہنا ہے کہ یہ چوکی ان کی زمین پر بنائی گئی ہے اور خدشہ ہے کہ یہ آگے بڑھائی جائے گی اور قریب کی بڑی بستیوں میں ضم کر دی جائے گی۔

اسرائیل مقبوضہ مغربی کنارے کے شہر بیتہ میں جمعہ کے روز آسمان دھویں سے بھر گیا، کیونکہ اس مقام پر فلسطنینیوں نے اسرائیلی آبادکاری چوکی کے خلاف مظاہرہ کیا۔

قریب کے دیہات میں رہنے والے فلسطینیوں کا کہنا ہے کہ یہ چوکی ان کی زمین پر بنائی گئی ہے اور خدشہ ہے کہ یہ آگے بڑھائی جائے گی اور قریب کی بڑی بستیوں میں ضم کر دی جائے گی۔

انہوں نے چوکی کے خلاف روزانہ مظاہرے کیے ہیں۔ مظاہرین اسرائیلی فوجیوں پر پتھراؤ کرتے ہیں جس کے جواب میں اسرائیلی فورسز کے اہلکار ان پر آنسو گیس کے گولے داغتے ہیں۔

حالیہ جھڑپوں میں دو نوعمر سمیت کم سے کم چار مظاہرین ہلاک ہوئے ہیں۔

آباد کاروں نے اس چوکی کا نام ایوئٹر رکھا ہے۔ جون کے آخر میں اسرائیل نے ایوئٹر میں بسنے والے آباد کاروں کے ساتھ سمجھوتہ کیا۔

معاہدے کے تحت آباد کاروں نے چوکی چھوڑ دی اور یہ علاقہ ایک بند فوجی زون بن گیا لیکن مکانات اور سڑکیں باقی رہ گئیں۔