مسجد نبوی ﷺ میں کورونا کے خاتمہ کے لیےخصوصی دعا

کورونا وائرس سے دنیا بھر میں جاری غیر یقینی صورت حال کو دیکھتے ہوئے مسجد نبویؐ میں خصوصی دعا کا اہتمام کیا گیا جس میں فرزندان توحید نے نفل نمازپڑھ کر مذکورہ وبا کے خاتمہ کے لیے بارگاہ الٰہی میں رقت آمیز دعا کی ۔

دنیا بھر میں عالمی وبا کورونا وائرس (کووڈ۔19) کے علاج اور اس کے خاتمہ کے لیے جہاں بڑے بڑے سائنس داں اور محقیقن تحقیق میں مصروف ہیں تو وہیں متعدد لیبارٹیز میں کورونا ویکسین کی دریافت اور کھوج بھی جاری ہے۔

اسی ضمن میں مختلف مذاہب کے لوگ اپنے اپنے انداز میں کورونا وبا کے خاتمہ کے لیے دعائیں بھی کررہے ہیں۔

دنیا بھر میں دوسری سب سے بڑی مسجد سعودی عرب کے شہر مدینہ میں واقع 'مسجد نبوی ﷺ' میں بھی کورونا کے خاتمہ کے لیے نفل نماز کا اہتمام کیا گیا اور خصوصی دعا کی گئی۔

مسجد نبوی ﷺ میں نماز کی امامت شیخ عبد الباری الثبیتی نے کی بعد ازاں موثر خطبہ بھی دیا جس میں مسلمانوں کو توبہ و استغفار کی ترغیب دی گئی اور اس وبا کے خاتمہ کے لیے دعائیں بھی کی گئیں۔

واضح رہے کہ قحط سالی، کسی بھی بڑی آفت اور وبا سے حفاظت اور خوشحالی کے لیے سنت نبوی ﷺ کے مطابق خصوصی نماز 'نماز استسقا' کا اہتمام کیا جاتا ہے۔

اس نماز کے دوران اللہ رب العزت سے دعا کی جاتی ہے۔

بارش کے لیے بھی دعا:

وبا کے خاتمہ کے ساتھ ساتھ اس دوران بارش کے لیے بھی دعا کی گئی۔ سعودی وائلڈ لائف اتھارٹی (ایس ڈبلیو اے) کے ایک عہدیدار نے بتایا 'بارشوں سے جنگلات کی زندگی اور پودے لگانے کے لئے موزوں ماحول پیدا ہوگا، ہم موسم بہار میں بھی بارش کی توقع کرسکتے ہیں'۔