کورونا وائرس کے خدشے کے پیش نظر قبلہ اول مسجدالاقصیٰ کو عارضی طور پر بند کر دیا گیا ہے۔
محکمہ اوقاف نے کورونا وائرس کے متعلق ایک ہنگامی نشست کے بعد مسجد بند کرنے کا فیصلہ کیا ہے۔ جس کے تحت مسجد میں نماز ادا نہیں کی جائے گی لیکن مقررہ وقت پر اذان ہوتی رہے گی۔
مقبوضہ بیت المقدس میں اسلامی مقدسات کے انتظام وانصرام کے ذمے دار محکمہ اوقاف کے مطابق اس کے قبل قبلہ اول کے صحن میں نمازادا کی جا رہی تھی۔
مسجدالاقصیٰ کے ڈائریکٹر عمر کسوانی نے بین الاقوامی خبررساں ایجنسی کو بتایا ہے کہ کورونا وائرس سے بچاؤ کے لیے مسجد الاقصیٰ میں نماز کی ادائیگی کو فی الحال روک دیا گیا ہے۔
واضح ہو کہ سعودی حکومت نے کووڈ-19 کے خدشے کے پیش نظر دیگر ممالک سے آنے والے عمرہ زائرین پر پابندی عائد کر رکھی ہے جب کہ مطاف کو بھی خالی کروا کر خانہ کعبہ میں جراثیم کش اسپرے کیا گیا تھا۔ دنیا بھر میں کووڈ-19 سے تحفظ کے لئے مذہبی اور دیگر اجتماعات پر پابندی لگا دی گئی ہے۔