بورس جانسن کا ماسک پہننے کی شرط ختم کرنے کا اعلان

عالمی وبا کورونا وائرس کے کم ہوتے اثرات کے سبب برطانوی وزیراعظم بورس جانسن نے ماسک پہننے اور سماجی فاصلے کی شرط ختم کرنے کا اعلان کر دیا۔

اطلاعات کے مطابق برطانوی وزیراعظم بورس جانسن نے میڈیا سے گفتگو کرتے ہوئے کہا کہ 19 جولائی سے ماسک پہننا ہر شخص کی اپنی مرضی ہوگی۔ انہوں نے کہا کہ ماسک پہننے کی قانونی پابندی 19 جولائی سے ختم کر دیں گے، اسی روز سماجی فاصلے کی پابندی بھی ختم ہوجائے گی۔

واضح رہے کہ گزشتہ ماہ برطانوی وزیراعظم بورس جانسن نے کورونا وائرس کے انڈین ویریئنٹ کو لاک ڈاؤن نرمی کے راستے میں رکاوٹ قرار دیا تھا۔

انہوں نے کہا تھا کہ کورونا وائرس کی مہلک وبا کی بھارتی قسم برطانیہ میں وبا کی تیسری لہر کا باعث بن سکتی ہے۔

انہوں نے کہا کہ جن علاقوں میں کورونا وائرس کی بھارتی قسم پھیل رہی ہے، وہاں کورونا ویکسینیشن میں اضافہ کیا جائے گا۔

وہیں پروفیسر کرس وٹی نے کہا کہ انڈین ویریئنٹ برطانوی ویریئنٹ سے زیادہ تیزی سے پھیلتا ہے، انڈین ویریئنٹ کی وجہ سے لاک ڈاؤن میں نرمی خطرے میں پڑگئی ہے۔

انہوں نے کہا کہ کورونا وائرس سے بچاؤ کیلیے ویکسین کی دوسری ڈوز 12 کے بجائے 8 ہفتے میں لگائی جائے گی۔