'بے بنیاد موقف اختیار کرنا قابل افسوس'

بھارت نے جموں و کشمیرسے متعلق برطانیہ کی حزب اختلاف پارٹی لیبر پارٹی کی تجویز کو سرے سے خارج کر دیا۔ بھارت نے کہا کہ اس مسئلے پر لیبرپارٹی یا اس کی قیادت کے ساتھ کوئی بات چیت کا سوال ہی نہیں اٹھتا۔

وزیراعظم کے ساتھ امریکہ کے دورے پر آئے وزارت خارجہ کے ترجمان رویش کمار نے بدھ کے روز یہاں ایک سوال کے جواب میں کہا کہ حکومت نے برطانیہ کی لیبر پارٹی کے سالانہ اجلاس میں جموں و کشمیر سے متعلق ہونے والی سرگرمیوں کا نوٹس لیا ہے۔

انہوں نے کہا کہ یہ افسوس کی بات ہے کہ لیبر پارٹی نے اس مسلئے پر بغیر معلومات کے بے بنیاد موقف اختیار کیا ہے۔

انہوں نے یہ بھی کہا ہے کہ یہ فیصلہ ووٹ بینک کا خیال کرتے ہوئے کیا گیا ہے۔ اس مسئلے پر لیبر پارٹی یا اس کی قیادت کے ساتھ کسی طرح سےبات کرنے کا کوئی سوال ہی نہیں اٹھتا۔

قابل ذکر ہے کہ لیبرپارٹی کے سالانہ اجلاس میں جموں وکشمیر سے متعلق ایک تجویز پاس کرکے کہا گیا ہے کہ اس مسلئے پر ثالثی کی کوشش کی جائے۔