بیرون ملک سے عمرہ زائرین کا پہلا کارواں سعودی عرب پہنچے گا

سعودی عرب میں کورونا کے معاملے میں کمی اور رفتہ رفتہ تمام چیزیں کھولنے کے دوران کورونا عہدمیں بیرون ملک سے عمرہ زائرین کا پہلا کارواں سعودی عرب پہنچے گا۔یہ بات حج وعمرہ کمیٹی نے کہی ہے۔

عمرہ زائرین کا پہلا کارواں جمعے کی رات9بجے نائجیریا سے جدہ ائیرپورٹ پہنچے گا۔ ائیرپورٹ سے ہوٹل اور مسجد الحرام لے جانے کے لیے خصوصی انتظامات کیے گئے۔زائرین کے ہرگروپ کو حرم شریف پہنچاکر خصوصی نگرانی میں عمرہ کرانے کا اہتمام کیا گیا ہے۔

مدینہ منورہ اور مسجد نبوی میں زیارت کے لیے بھی خصوصی انتظامات کیے گئے ہیں۔ نئے عمرہ پروگرام کے تحت آن لائن مکمل عمرہ پیکج باآسانی حاصل کیا جاسکتا ہے۔

خیال رہے کہ 9 اگست سے عمرے کی ادائیگی کا سلسلہ شروع ہوچکا ہے، پابندی کے شکار ملکوں کے علاوہ دیگر ممالک سے تعلق رکھنے والے غیرملکی عمرہ ادا کرسکیں گے۔

واضح رہے کہ سعودی عرب کی جانب سے جن ممالک کے عازمین پر عمرہ ادائیگی کی پابندی عائد کی گئی، اُن میں پاکستان، ہندوستان، انڈونیشیا، مصر،ترکی، ارجنٹائن، برازیل، جنوبی افریقہ اور لبنان شامل ہیں۔

یو این آئی