سری لنکا کو بھارت سے 20 جدید ترین ریل مسافر کوچز ملے

سری لنکا کو بھارت سے دونوں ممالک کے درمیان 8.2 کروڑ امریکی ڈالر سے زائد کے معاہدے کے تحت 20 جدید ترین ریل مسافر کوچز ملے ہیں۔ ریل انفراسٹرکچر کی ترقی میں سری لنکا کی مدد کے لیے بھارت نے یہ معاہدہ کیا ہے۔

بھارتی ہائی کمیشن نے سنیچر کے روز یہاں کہا کہ پبلک سیکٹر کمپنی ریل انڈیا ٹیکنیکل اینڈ اکنامک سروس لمیٹڈ کی ذریعے فراہم کردہ 20 کوچز جمعہ کو کولمبو بندرگاہ پر پہنچے۔

ہائی کمیشن نے کہا کہ یہ سامان سری لنکا ریلوے کے ساتھ 160 مسافر کوچوں کی فراہمی کے معاہدے کا حصہ ہے، جس کو 3.18 کروڑ امریکی ڈالر کی بھارتی قرض کی مدد کے ذریعے فنڈ کیا گیا ہے۔ اس معاہدے کی قیمت 8.26 کروڑ امریکی ڈالر ہے۔

ہائی کمیشن نے کہا کہ ان جدید ترین 'بھارت میں تیار' مسافر کوچز کو سری لنکا ریلوے کی ضرورتوں کے مطابق بنایا گیا ہے۔

اس کھیپ کے ساتھ سری لنکا کو کل 160 کوچوں میں سے 60 کوچز فراہم کی گئی ہیں اور 20 کوچ بھارت سے بھیجنے کے لیے تیار ہیں۔