سری لنکا میں نقاب پر پابندی

سری لنکائی صدر متھری پالا سری سینا نے ملک میں حالیہ خود کش دھماکوں کے بعد ہنگامی قانون کے تحت ملک میں نقاب پہننے اور چہرہ چھپانے پر پابندی عائد کر دی ہے۔

صدر سری سینا کا کہنا ہے کہ وہ ہنگامی قانون کے تحت عوامی مقامات پر کسی بھی طرح کے نقاب یا چہرہ چھپانے پر پابندی عائد کررہے ہیں۔

بیان میں مزید کہا گیا ہے کہ اس پابندی کا مقصد قومی سلامتی کو یقینی بنانا ہے۔ صدر کے دفتر سے جاری بیان میں کہا گیا ہے کہ پابندی کا اطلاق پیر سے ہوگا۔

یہ پابندی ایک ایسے وقت میں لگائی گئی ہے جب مسلم مذہبی رہنماؤں نے بھی مسلمان خواتین پر زور دیا ہے کہ وہ کسی بھی ردعمل سے پچنے کے لیے نقاب نہ پہنیں۔

سری لنکا میں تقریبا 10 فیصد مسلمان آباد ہیں اور وہ مذہب کے معاملے میں اعتدال پسند مانے جاتے ہیں۔