طالبان کے حملے میں 26 پولیس اہلکار ہلاک

کم از کم 26 پولیس اہلکار اس وقت ہلاک ہوگئے جب طالبان باغیوں نے شمالی افغانستان کے صوبے بغلان میں ایک پولیس چوکی پر حملہ کر دیا۔

ہفتے کے روز ایک مقامی اہلکار نے یہ اطلاع دی۔
بغلان ریاستی کونسل کے ایک رکن فیروزالدین اعمق نے روسی خبررساں ایجنسی اسپوتنک سے کہا کہ گذشتہ رات طالبان نے ایک شمالی ضلع میں ایک پولیس چوکی پر دھاوا بول دیا ۔اس حملے میں ان کے ایک کمانڈر صلاح الدین کوہگاڈے سمیت 12 پولیس اہلکار زخمی ہوگئے جن کی اسپتال میں حالت نازک ہے۔
اعمق کے مطابق بغلان کےشمالی ضلع میں افغان حکو مت کی موجودگی محدود ہے۔ نصف ضلع کو طالبان اور نصف کو مقامی نیم فوجی دستہ کنٹرول کرتا ہے۔
طالبان نے حملے کی ذمہ داری قبول کی ہے۔
یہ حملہ ایسے وقت میں ہواجب طالبان اور امریکہ کے درمیان قطر کے دارالحکومت دوحہ میں ہونے والی امن مذکرات ساتویں مرحلے میں داخل ہونے کو ہیں۔