امریکہ: اقتدار منتقل کرنے کی اجازت

امریکہ کے صدارتی انتخابات میں جو بائیڈن کو کامیابی ملنے کے باوجود صدر ٹرمپ اپنی کرسی چھوڑنے کے لیے تیار نہیں ہیں۔ تاہم انہوں نے اقتدار منتقلی کی اجازت دے دی ہے، لیکن ان کا کہنا ہے کہ انتخابات میں بڑے پیمانے پر دھاندھلی ہوئی ہے اور وہ قانونی لڑائی جاری رکھیں گے۔

امریکی جنرل سروسز ایڈمنسٹریشن نے اس بات کی تصدیق کی ہے کہ 3 نومبر کو ہونے والے صدراتی انتخابات میں ڈیموکریٹک پارٹی کے صدارتی امیدوار جو بائیڈن 'واضح فاتح' ہیں۔

اپنی شکست تسلیم کرنے سے انکار کرنے والے صدر ڈونلڈ ٹرمپ نے پیر کو کہا کہ وہ اپنی ٹیم کو اقتدار منتقلی میں تعاون کرنے کی ہدایت کر رہے ہیں، لیکن وہ قانونی لڑائی جاری رکھنے کا عزم کرتے ہیں۔

ٹرمپ نے ٹویٹ کیا کہ 'ہمارا معاملہ مضبوطی سے جاری ہے، ہم اچھی لڑائی جاری رکھیں گے اور مجھے یقین ہے کہ ہم فتح حاصل کریں گے! بہر حال ملک کے مفاد میں تجویز کر رہا ہوں کہ ایملی اور ان کی ٹیم ابتدائی پروٹوکول کے حوالے سے جو کچھ کرنے کی ضرورت ہے وہ کرے'۔

اس اقدام سے ٹرمپ انتظامیہ سے اقتدار منتقلی کے آغاز کا راستہ صاف ہوجاتا ہے اور بائیڈن کو 20 جنوری کو اقتدار سنبھالنے کے منصوبوں پر وفاقی ایجنسیوں کے ساتھ ہم آہنگی کی اجازت دی گئی ہے۔