Palestine: امریکہ، فلسطینیوں کو $360 ملین کی امداد فراہم کرے گا

امریکہ فلسطین Palestine کے لوگوں کو 360 ملین ڈالر سے زیادہ کی امداد فراہم کرنے کے عمل میں ہے جس سے فلسطینیوں کی معیشت، ترقی اور سلامتی بہتر ہوسکے۔

یروشلم: امریکی وزیر خارجہ انٹنی بلنکن Antony Blinken نے فلسطینیوں کے لئے نئی مالی اعانت کا اعلان کیا ہے۔ انہوں نے کہا ہے کہ امریکہ فلسطینیوں کو 360 ملین ڈالر سے زیادہ کی امداد فراہم کرنے کے عمل میں ہے۔ اس میں ویسٹ بینک اور غزہ Gaza میں انسانیت کی بنا پر 38 ملین ڈالر کی نئی امداد شامل ہے۔

بلنکن نے ایک بیان میں کہا ہے کہ نئی امداد میں اقوام متحدہ کی ریلیف ایجنسی (یو این آر ڈبلیو اے) کی جانب سے ویسٹ بینک اور غزہ میں فلسطینی پناہ گزینوں کے لئے تقریباً 33 ملین ڈالر کی رقم شامل ہے۔ اس امداد سے انسانی فلاح و بہبود کے لیے کام کرنے والی تنظیم کو ہنگامی پناہ گاہیں، خوراک، امدادی سامان اور صحت کی دیکھ بھال کے ساتھ ساتھ ذہنی صحت اور نفسیاتی مدد فراہم کی جائیں گی۔

اس کے علاوہ امریکی وزیر خارجہ نے کہا کہ امریکہ اگلے سال ترقی اور معاشی امداد کے لئے 75 ملین ڈالر فراہم کرنے کا ارادہ رکھتا ہے، جو ویسٹ بینک اور غزہ میں تعمیر نو میں مدد کرے گا۔

واضح رہے کہ امریکہ نے مارچ اور اپریل میں فلسطینیوں کی معیشت، ترقی اور سلامتی کے لئے 250 ملین ڈالر سے زیادہ کی امداد کا اعلان کیا تھا۔

بلنکن نے کہا کہ اس رقم کا انتظام اس طرح سے کیا جائے گا کہ یہ حماس تک نہ پہنچے اور اس سے صرف فلسطینی عوام کو فائدہ ہو۔ انہوں نے کہا کہ امریکی حکومت اس بات کو یقینی بنانے کے لئے پوری طرح سے پرعزم ہے کہ اس کی ساری امداد ٹیلر فورس ایکٹ سمیت امریکی قوانین کے مطابق مہیا کی جائے گی۔