جان بولٹن مستعفی یا برطرف؟

امریکی صدر ڈونلڈ ٹرمپ نے اپنے قومی سلامتی مشیر جان بولٹن کو عہدے سے برطرف کر دیا ہے۔

ٹرمپ نے آج ایک ٹویٹ میں کہا کہ ’انتظامیہ کے دیگر افراد کی طرح مجھے بھی جان بولٹن کی بہت سی تجاویز سے سخت اختلاف تھا اور میں نے ان سے استعفیٰ دینے کےلیے کہا تھا تھا جبکہ انہوں نے اپنا استعفیٰ میرے حوالہ کردیا۔ میں نے جان کو آگاہ کیا تھا کہ اب وائٹ ہاوز میں ان کی کوئی ضرورت نہیں ہے۔‘

ٹرمپ نے مزید بتایا کہ وہ جان بولٹن کے متبادل کا اعلان اگلے ہفتے کریں گے۔

دوسری جانب جان بولٹن نے کہا کہ انہیں ٹرمپ کی جانب سے برطرف نہیں کیا گیا بلکہ انہوں نے خود استعفیٰ دیا ہے۔ بولٹن نے ٹویٹ میں لکھا کہ ’میں نے کل رات صدر ٹرمپ کو استعفیٰ کی پیش کش کی تھی لیکن انہوں نے، کل بات کریں گے کہتے ہوئے مسئلہ کو ٹال دیا تھا۔‘

واضح رہے کہ ٹرمپ کے ٹوئٹ سے قبل وائٹ ہاؤس نے بتایا تھا کہ جان بولٹن دہشت گردی کے مسئلہ پر سیکرٹری خارجہ مائیک پومپیو کے ہمراہ پریس کانفرنس سے خطاب کریں گے۔

یہاں یہ بات بھی قابل ذکر ہوگی کہ جان بولٹن افغان طالبان کے ساتھ امن معاہدے کے سخت مخالف تھے۔

ٹرمپ نے دو روز قبل ہی طالبان کے ساتھ افغان امن مذاکرات کی معطلی کا اعلان کیا تھا۔

جان بولٹن کو 23 مارچ 2018 میں قومی سلامتی کا مشیر بنایا تھا جبکہ وہ اس سے قبل اقوام متحدہ میں امریکی سفیر رہ چکے تھے۔