امریکہ میں کورونا سے ایک دن میں تین ہزار سے زیادہ اموات

امریکہ میں گزشتہ 24 گھنٹے میں 3011 کورونا مریضوں کی جان گئی ہے۔ گزشتہ ہفتے یومیہ اموات کی تعداد 2760 تھی۔

عالمی وبا کورونا وائرس کا قہر امریکہ میں جاری ہے اور یہاں ایک دن میں ریکارڈ تین ہزار سے زیادہ متاثرین کی اموات ہوئی ہیں۔

نیویارک ٹائمس کی رپورٹ کے مطابق امریکہ میں گزشتہ 24 گھنٹے میں 3011 کورونا مریضوں کی جان گئی ہے۔ گزشتہ ہفتے یومیہ اموات کی تعداد 2760 تھی۔

جان ہاپکنز یونیورسٹی کی جانب سے جاری اعداد و شمار کے مطابق دنیا بھر میں کورونا سے سب سے زیادہ متاثر امریکہ میں اب تک 15384264 معاملے سامنے آئے ہیں جبکہ 289357 لوگوں کی موت ہوچکی ہیں۔

امریکہ کی جان ہاپکنز یونیورسٹی کے سائنس اور انجینئرنگ سینٹر (سی ایس ایس ای) کے جاری کردہ اعداد و شمار کے مطابق کورونا وائرس اب تک 192 ممالک میں 6.88 کروڑ افراد کو متاثر کر چکا ہے، جبکہ 15.68 لاکھ مریض اپنی جان گنوا چکے ہیں۔

کورونا سے سب سے زیادہ متاثر امریکہ میں اب تک 1.53 کروڑ سے زیادہ افراد متاثر ہوئے ہیں جبکہ 2.89 لاکھ مریض فوت ہوچکے ہیں۔

انفیکشن کے معاملوں کے لحاظ سے دوسرے سب سے زیادہ متاثر ملک بھارت میں متاثرہ افراد کی تعداد 97.67 لاکھ کے قریب ہوگئی ہے اور 1.41 لاکھ افراد اپنی جانوں سے ہاتھ دھو بیٹھے ہیں۔ یہاں اب تک 92.53 لاکھ مریضوں نے کورونا کو شکست بھی دی ہے اور اموات کی شرح محض 1.45 فیصد ہے۔

برازیل میں کورونا وائرس سے متاثرہ افراد کی تعداد 67.28 لاکھ سے تجاوز کرچکی ہے اور 1.78 لاکھ مریض فوت ہوچکے ہیں۔ روس میں کورونا سے متاثرہ افراد کی تعداد 25.18 لاکھ کے قریب پہنچ چکی ہے جبکہ 44220 افراد لقمہ اجل بن چکے ہیں۔ فرانس میں 23.77 لاکھ سے زیادہ افراد متاثر اور 56752 مریض فوت ہوچکے ہیں۔