سی آئی اے کے جاسوسوں کو گرفتار کرنے کا دعویٰ

ایران نے دعویٰ کیا ہے کہ اس نے امریکی جاسوس ایجنسی سی آئی اے کے لیے کام کرنے کے الزام میں 17 جاسوسوں کو گرفتار کیا ہے ان میں کچھ کو سزائے موت دی جاچکی ہے۔

وزارت انٹلی جنس نے بتایا کہ مشتبہ جاسوس نیوکلیائی، فوجی اور دیگر شعبوں کی معلومات جمع کررہے تھے۔

امریکی صدر ڈونالڈ ٹرمپ نے ایران کے الزامات کو پوری طرح مسترد کرتے ہوئے کہا ہے کہ یہ ’مکمل طور سے جھوٹ‘ ہے۔

واضح رہے کہ ٹرمپ گزشتہ برس ایران سے ہوئے بین الاقوامی نیوکلیائی معاہدے سے نکل گئے تھے اور ایران پرامریکہ نے معاشی پابندی دوبارہ عائد کردی تھی۔

حالیہ ہفتوں میں دونوں ممالک خلیج فارس میں فوجی تصادم کے قریب تر ہوگئے تھے۔

ایران کی جانب سے گرفتاری کے اعلان کے بعد ایک مختصر بیان میں ٹرمپ نے کہا کہ ’’میں ایران کے ساتھ ایک معاہدہ کرنا چاہتا ہوں۔‘‘

ایران کا کہنا ہے کہ ان جاسوسوں نے مبینہ طور سے امریکہ سینٹرل انٹلی جنس ایجنسی کے لیے ایک سال سے زیادہ عرصے تک رواں سال مارچ تک کام کیا تھا۔