نائیجیریا: بوکو حرام کے قبضے سے 344 مغوی طلبا رہا

گذشتہ ہفتہ نائیجیریا کے شمالی صوبے کاتسینا میں شدت پسند تنظیم بوکو حرام نے اسکول میں داخل ہوکر تقریباً 400 سے زائد بچوں کا اغواء کرلیا تھا۔ آج مغوی طلبا رہا ہوکر دارالحکومت کاتسینا پہنچ گئے ہیں۔

مغربی افریقی ملک نائیجیریا کے شمالی صوبے کاتسینا میں گذشتہ ہفتہ دیر رات موٹر سائیکلوں پر سوار مسلح افراد نے کنکارہ گورنمنٹ سکینڈری اسکول پر دھاوا بول دیا تھا اور تقریباً 400 طلبا کا اغوا کرلیا تھا۔

یہ واقعہ گذشتہ ہفتہ کا ہے جب کنکارہ گورنمنٹ سیکینڈری اسکول پر کچھ مسلح افراد نے حملہ کر دیا۔ اسکول کے سیکیورٹی اہلکاروں کا قتل کرنے کے بعد وہ اسکول احاطے میں داخل ہوگئے۔ حملے کے وقت 800 سے زائد بچے اسکول میں موجود تھے۔ حملے کے دوران بڑی تعداد میں اسکول کے بچے آس پاس کے علاقوں میں چھپ گئے۔

شدت پسند تنظیم بوکو حرام نے اس اغوا کی ذمہ داری قبول کرتے ہوئے کہا کہ انہوں نے اسکول پر حملہ اس لیے کیا کیونکہ ان کا خیال ہے کہ مغربی تعلیم غیر اسلامی ہے۔

نائیجیریا میں بوکو حرام شدت پسند تنظیم نے گزشتہ روز اغوا کردہ بچوں کا فوٹیج جاری کیا تھا جو نامعلوم جنگلات میں نظر آرہے تھے۔

اس حملے کے بعد سے ریاست کے تمام سیکنڈری اسکولز بند کر دیے گئے ہیں۔

نائیجیریا کے دارالحکومت کاتسینا کے گورنر امینو بیلو مساری نے کہا ہے کہ طلبا کو ان کے اہل خانہ کے سپرد کرنے سے پہلے ان طلبا کا معائنہ کیا جائے گا۔

خیال رہے کہ نائیجیریا میں بوکو حرام شدت پسند تنظیم کی جانب سے اس طرح کے واقعات اس سے پہلے بھی انجام دیے گئے ہیں۔ سنہ 2014 میں بوکو حرام تقریبا تین سو طالبات کا اغوا کیا تھا۔