Raju Srivastava death: راجو سریواستو کی انتقال پر بالی ووڈ ہستیوں نے دلی تعزیت کا اظہار کیا

مشہور کامیڈین راجو سریواستو کی انتقال کی خبر سامنے آنے کے بعد پورے ملک میں غم کا ماحول ہے۔ مداحوں سمیت کئی بالی ووڈ ہستیاں کامیڈین کو خراج عقیدت پیش کر رہے ہیں ۔Raju Srivastava death

حیدرآباد (تلنگانہ):بھارت کے ہر گھر میں گجودھر بھیا کے نام سے مشہور ہونے والے مزاحیہ اداکار راجو سریواستو نے بدھ 21 ستمبر کو 58 سال کی عمر میں آخری سانس لی۔ معروف کامیڈین گزشتہ 40 دنوں سے اپنی زندگی کی جنگ لڑ رہے تھے۔ راجو کے انتقال کی خبر آنے کے بعد سوشل میڈیا پرمداحوں سمیت کئی بالی ووڈ اسٹارز نے ان کی موت پر تعزیت کا اظہار کیا ہے۔Raju Srivastava death

فلمساز مدھور بھنڈارکر نے ٹویٹ کرتے ہوئے لکھا کہ 'راجو سریواستو کے بے وقت انتقال کی المناک خبر سن کر افسوس ہوا۔ انہوں نے اتنے برسوں تک اپنی حیرت انگیز مزاحیہ انداز سے ہم سب کو خوب ہنسایا۔ ہم نے ایک جوہر کھو دیا ہے۔ ان کے اہل خانہ اور مداحوں سے میری گہری تعزیت'۔

اداکارہ اور سیاست دان جیا پردا نے ٹویٹ کرتے ہوئے راجو کو وہ شخص قرار دیا جس نے ہمیشہ سب کو ہنسایا۔ جیا پردا نے لکھا کہ ' مشہور کامیڈین راجو سریواستو جی ہمارے درمیان نہیں رہے۔ سب کو ہمیشہ ہنسانے والا انسان آج خود خاموش ہوگیا اور سب کو اداس کرگیا۔ انہیں دلی خراج عقیدت'۔

کامیڈین وپل گوئل نے راجو کے ساتھ ایک تصویر شیئر کی اور کہا کہ 'لیجینڈ راجو سریواستو آپ کی روح کو سکون ملے۔ اس شام کو ہمیشہ یاد رکھوں گا۔ ہم سب کی تفریح کرنے اور تمام کامیڈین کو متاثر کرنے کے لیے آپ کا شکریہ'۔

مزاحیہ اداکار کے انتقال پر افسوس کا اظہار کرتے ہوئے ہزارون خواشیں ایسی کے ہدایتیکار سدھیر مشرا نے کہا کہ 'راجو سریواستو چلے گئے ہیں! امید ہے کہ انہوں نے جو سبق دیا ہے وہ یہ ہے کہ ہمیشہ گستاخ ہونا چاہیے۔ اتھارٹی کے منہ پر ہنسنا ایک بنیادی حق ہے، الوداع'۔

کشمیر فائلز کے فلمساز وویک اگنی ہوتری نے ٹویتر میں ایک ویڈیو پوسٹ کرتے ہوئے کہا کہ 'میرے بھائی، دوست اور بھارت کے سب سے پسندیدہ کامیڈین اب نہیں رہے۔ میں بہت غمگین ہوں، ان جیسا فنکار کم ہی نظر آتا ہے، انہوں نے بھارت میں اسٹینڈاپ کامیڈی کی شروعات کی۔ بھارت میں ان جیسا دوسرا کوئی نہیں ہوگا۔ راجو سریواستو بہت جلد چلے گئے۔ میں دعا کرتا ہوں کہ ان کی روح کو سکون ملے۔ میری دعائیں ان کے اہل خانہ اور مداحوں کے ساتھ ہیں'۔

ان کا انتقال آل انڈیا انسٹی ٹیوٹ آف میڈیکل سائنسز (ایمس) میں ہوا۔ راجو کو جم میں ورزش کے دوران سینے میں درد کی شکایت کے بعد یہاں داخل کرایا گیا تھا۔ ان کے پسماندگان میں ان کی اہلیہ شیکھا اور دو بچے انترا اور آیوشمان ہیں۔