پاکستانی اداکار عدنان صدیقی نے جمعہ کے روز ٹویٹر پر پرینکا چوپڑا کو ٹیگ کرتے ہوئے ان کی اس پوسٹ پر اعتراض ظاہر کیا ہے جس میں اداکارہ نے شرمین عبید چنائے کو 'جنوبی ایشیائی' کہا ہے۔ حال ہی میں پرینکا نے اسٹار وارز کے لیے شرمین کی تعریف کرتے ہوئے ایک پوسٹ شیئر کی تھی۔ اس پوسٹ پر ردعمل ظاہر کرتے ہوئے عدنان نے ایک ٹویٹ کیا اور ان کی تنقید کی۔ انہوں نے پوسٹ میں لکھا کہ 'پرینکا چوپڑا میں پورے احترام کے ساتھ، آپ کے علم میں تھوڑا اضافہ کرنا چاہوں گا کہ شرمین عبید چنائے ایک پاکستانی ہیں، بالکل اسی طرح جیسے ساؤتھ ایشین ہونے کا دعویٰ کرنے سے پہلے، آپ کو جب بھی موقع ملتا ہے، آپ بڑی فخر سے خود کو بھارتی بتاتی ہیں'۔
پرینکا نے حال ہی میں شرمین کو اپنے انسٹاگرام اسٹوریز پر مبارکباد دی۔ انہوں نے لکھا تھا کہ 'اسٹار وار فلم کی ہدایت کاری کرنے والی پہلی خاتون - اور وہ ساؤتھ ایشین ہیں! کتنا تاریخی لمحہ ہے شرمین۔آپ پر بہت فخر ہے میری دوست'۔ پرینکا کے علاوہ کئی مشہور شخصیات نے شرمین عبید چنائے کو فلم کے لیے مبارکباد دی ہے۔ جس میں پاکستان کے بھی کئی مشہور شخصیات شامل ہیں۔ مہوش حیات سمیت ماہرہ خان نے شرمین کو مبارکباد بھیجی ہے۔