بنارس میں بی جے پی کارکنان کا شاندار جشن

ایگزٹ پول نے جن نتائج کا اندازہ لگایا تھا بی جے پی کو اس سے زیادہ ہی سیٹیں ملیں اور بی جے پی کارکنان نے سڑکوں پر نکل کر ڈھول تاشوں کے ساتھ جشن منانا شروع کر دیا ہے۔

اترپردیش کے شہر بنارس کے قلب میں واقع گودولیا چوراہے پر باقاعدہ ایک اسٹیج بناکر لڈو تقسیم کیے جا رہے ہیں اور لوگ ایک دوسرے کو مبارکباد پیش کر رہے ہیں۔ 'ہر ہر مودی۔ گھرگھر مودی' کے نعرے لگائے جا رہے ہیں۔

بنارس میں بی جے پی کے اقلیتی سیل کی جانب سے بھی مدن پورا علاقے میں بی جے پی کارکنان نے آتش بازی کی اور مودی کی فتح یابی کے نعرے لگائے۔

کارکنان سے جب اس سلسلے میں پوچھا گیا کہ 2014 کے بعد مسلمانوں کو جس طرح سے گوکشی کے نام پر لو جہاد کے نام پر پریشان کیا گیا تھا تو اس بات کی کوئی گارنٹی دے گا کہ یہ سب اس حکومت میں نہیں ہوگا؟

کارکنان نے جواب دیتے ہوئے کہا کہ مودی جی اب صرف ترقی کی باتیں کر رہے ہیں اور ملک ترقی کی راہ پر گامزن ہے۔