آندھرا پردیش: کورونا متاثرین کی تعداد 2200 سے تجاوز

ریاست آندھرا پردیش میں نئے 48 معاملات کے ساتھ ہی مہلک کورونا وائرس سے متاثرہ افراد کی تعداد 2205 تک پہنچ گئی ہے۔

ریاست آندھرا پردیش (اے پی) میں کورونا وائرس کے48نئے مثبت معاملات درج ہوئے ہیں۔ اس ریاست میں روز بروز اس وبا کے مریضوں کی تعداد میں اضافہ ہوتا جا رہا ہے۔

محکمہ صحت کی جانب سے جاری کردہ اعداد و شمار کے مطابق ریاست میں نئے معاملات کے سامنے آنے کے ساتھ ہی ریاست میں کورونا وائرس کے مریضوں کی تعداد بڑھ کر2205تک جا پہنچی۔

گزشتہ 24گھنٹوں کے دوران یہ نئے معاملات سامنے آئے ہیں۔ سب سے زیادہ معاملات گزشتہ 24گھنٹوں کے دوران کرنول، گنٹوراور نیلور اضلاع میں درج کئے گئے ہیں۔ ان اضلاع میں گزشتہ 24گھنٹوں کے دوران نو نو (9) افراد اس وبا سے متاثر ہوئے ہیں۔ دوسرے نمبر پر ضلع چتور رہا جہاں 8معاملات کورونا وائرس کے درج کئے گئے ہیں۔ تیسرے نمبر پر ضلع کرشنا رہا ہے۔ اس ضلع میں 7نئے معاملات درج کئے گئے ہیں۔

اضلاع وجیانگرم، سریکاکلم، پرکاشم، مشرقی گوداوری اور اننت پور میں گزشتہ 24گھنٹوں کے دوران کوئی بھی نیا معاملہ درج نہیں ہوا ہے جبکہ بہ حیثیت مجموعی 608معاملات کے ساتھ سب سے آگے ضلع کرنول ہے۔ دوسرے نمبر پر ضلع گنٹور ہے جہاں 413معاملات درج کئے گئے ہیں۔

اے پی میں اب تک1353افراد روبہ صحت ہو چکے ہیں جن کو گھر جانے کی اجازت دے دی گئی ہے۔ سب سے زیادہ روبہ صحت ہونے والے افراد ضلع کرنول میں ہوئے جہاں 390افراد کو ڈسچارج کیا گیا۔

ریاست میں اس موذی مرض سے مزید چار افراد کی موت واقع ہوئی ہے۔ اس طرح اس وبا سے مرنے والوں کی تعداد 49تک جا پہنچی ہے۔