ادھم پور: سرکاری اعزاز کے ساتھ میجر روہت کی آخری رسومات

ہیلی کاپٹر حادثے میں ہلاک ہونے والے میجر روہت کی آخری رسومات ادھم پور کے دیویکا گھاٹ پر سرکاری اعزاز کے ساتھ ادا کی گئی۔

گزشتہ روز بھارتی فوج کا ہیلی کاپٹر ضلع ادھم پور کے علاقے پتنی ٹاپ میں گرکر تباہ ہو گیا تھا جس میں دو پائلٹ ہلاک ہوگئے۔ ہیلی کاپٹر حادثے میں ہلاک ہونے والے میجر روہت کی آخری رسومات ادھم پور کے دیویکا گھاٹ پر سرکاری اعزاز کے ساتھ ادا کی گئی۔

میجر روہت جموں و کشمیر کے ضلع سانبہ گھگوال کے رہائشی تھے۔ ان کے والد بھی بھارتی فوج میں خدمات انجام دے چکے ہیں۔ اب ان کا خاندان دہلی میں رہتا ہے۔

واضح رہے کہ ہیلی کاپٹر حادثہ گھنے کہرے کی وجہ سے ہوا تھا جس میں دو پائلیٹس کی موت ہوئی۔ مقامی لوگوں نے فوری طور پر ان دونوں پائلٹس کو ہیلی کاپٹر سے نکال کر ہسپتال پہنچایا تھا لیکن دونوں جانبر نہیں ہوسکے۔

پولیس انتظامیہ اور فوج کے افسران نے انہیں فوری طبی امداد دی لیکن علاج کے دوران ہی دونوں پائلٹس کی موت ہوگئی۔ آج نم آنکھوں کے ساتھ میجر روہت کو الوداع کہا گیا۔