سرینگر کی شیر کشمیر پارک میں آج نیشنل کانفرنس کی جانب سے ایک انتخابی ریلی منعقد ہوئی جس وجہ سے انتظامیہ نے سیکورٹی کے خدشات کے تناظر میں دارالحکومت سرینگر کو جوڑنے والی اہم سڑک کو کھار دار تار سے سیل کیا تھا۔
جگہ جگہ پولیس کی بھاری نفری کو بھی تعینات رکھا گیا تھا۔ جس وجہ سے ایک ہی سڑک کے استعمال سے سرینگر میں ٹریفک جام کے مناظر دیکھنے کو ملے۔
صبح سے ہی ملازمین، کاروباریوں اور ٹرانسپورٹ سے وابستہ افراد کو کافی دقتوں کا سامنا کرنا پڑا جبکہ عام لوگوں کو آدھے گھنٹے کا سفر دو گھنٹوں میں طے کرنا پڑا۔
ٹریفک جام کے مناظر دیکھتے ہوئے جب ای ٹی وی بھارت کے نمائندے نے ٹریفک جام میں پھنسے مسافروں سے بات کی تو انہوں نے کہا کہ ’’انتظامیہ کو اس طرح کے انتخابی جلسے جلوس سرینگر شہر سے باہر کروانے کی اجازت دینی چاہیے تھی۔‘‘
انہوں نے کہا کہ ’’اس سے مسافرین کو ذہنی کوفت کا سامنا کرنا پڑتا ہے۔‘‘