ہڑتال کے سبب تمام تعلیمی ادارے، کاروباری مراکز، دکانیں بند ہیں، جبکہ سڑکوں پر سے ٹریفک کی آمد و رفت بھی معطل ہے۔
ادھر پلوامہ ضلع کے مین قصبہ میں کرفیو نافذ کیا گیا اور کسی کو بھی چلنے کی اجازت نہیں دی جا رہی ہے۔ اس کے ساتھ ساتھ پلوامہ میں موبائل انٹرنیٹ خدمات بھی منقطع کر دی گئی ہیں۔
واضح رہے کہ آج علی الصبح پلوامہ کے ڈلی پورہ علاقے میں فورسز اور عسکریت پسندوں کے بیچ تصادم میں تین عسکریت پسند مارے گئے جبکہ ایک عام شہری رئیس احمد ڈار بھی ہلاک ہوا۔
پولیس ذرائع نے مارے گئے عسکریت پسندوں کی شناخت نصیر احمد پنڈت ساکنہ کریم آباد پلوامہ، عمر میر ساکنہ برتھی پورہ شوپیان اور خالد احمد کے طور پر کی ہے۔ خالد کو غیر ملکی عسکریت پسند بتایا جا رہا ہے۔
ادھر ضلع شوپیان میں برتھی پورہ کے رہنے والے عسکریت پسند کی ہلاکت کی خبر پھیلتے ہی دکانیں اور کاروباری ادارے بند ہوئے۔ اس دوران بٹہ پورہ چوک میں فورسز اور نوجوانوں کے بیچ پتھراؤ کے واقعات پیش آئے، پتھراؤ کررہے مظاہرین کو بعد میں فورسز نے شلنگ سے منتشر کیا۔