ای ٹی وی بھارت کے ساتھ بات کرتے ہوئے رائزنگ کشمیر کے صحافیوں کا کہنا ہے کہ شجاعت بخاری کی ہلاکت سے ادارے میں خلاء جو پیدا ہوا ہے اسے کوئی دوسرا شخص پُر نہیں کرسکتا۔ یعنی ان کا کہنا تھا کہ کوئی دوسرا شخص شجاعت بخاری کی جگہ نہیں لے سکتا۔
'شجاعت بخاری کا دست شفقت چھینا گیا'
انہوں نے کہا کہ شجاعت بخاری ان کے لیے صرف مدیر ہی نہیں بلکہ استاد، رہنماء اور دوست بھی تھے۔
سنہ 2018 میں آج ہی کے دن بے باک صحافی شجاعت بخاری کو فائرنگ کر کے قتل کر دیا گیا۔
موٹر سائیکل پر سوار نامعلوم مسلح افراد نے شجاعت بخاری پر اُس وقت فائرنگ کی جب وہ اپنے اخبار کے دفتر سے نکل کر واپس گھر کی جانب روانہ ہو رہے تھے۔
پولیس کے مطابق بخاری عسکریت پسندوں کی فائرنگ کا نشانہ بنے۔
رائزنگ کشمیر میں کام کر رہی خاتون صحافی رابعہ بشیر نے کہا کہ شجاعت بخاری ان کے لیے ایک مدیر، استاد اور ایک اچھے دوست تھے۔
انہوں نے کہا کہ ان کے پاس الفاظ ہی نہیں ہے جس سے وہ شجاعت بخاری کے بعد پیدا شدہ خلاء کو بیان کر سکتی ہیں۔
صحافی منصور پیر نے کہا کہ شجاعت بخاری کی ہلاکت نہ صرف رائزنگ کشمیر بلکہ پوری وادی کشمیر کے لیے بڑا دھچکا ہے۔
اردو روزنامہ 'بلند کشمیر' کے مدید راشد مقبول نے ای ٹی وی بھارت کو بتایا شجاعت بخاری کی جو خوبیاں تھیں ان کو کسی دوسرے شخص میں پانا بہت مشکل ہے۔ شجاعت بخاری کا جو مشن تھا اس کو ہم جاری و ساری رکھیں گے'۔
راشد مقبول کا مزید کہنا ہے کہ اگر شجاعت بخاری کا قتل کیا گیا تو یہ محض ایک فرد اور جسم کا قتل تھا انکی فکر کو کوئی نہیں کچل سکتا۔
انہوں نے مزید کہا کہ انکی یاد بہت ستاتی ہے اور انکا دست شفقت 'ہم سے چھینا گیا'۔
ادارے میں کام کرنے والے فوٹو جرنلسٹ نثار الحق شجاعت بخاری کی موت کے ایک برس بعد بھی صدمے میں ہیں۔
شجاعت بخاری کے ساتھ گزارے ہوئے ایام کی جب بھی نثار یاد کرتے ہیں تو ان کی آنکھیں اشکبار ہوجاتی ہیں۔
نثار کے مطابق شجاعت بخاری کی ہلاکت سے ان کا سب کچھ لٹُ گیا۔ ان کے مطابق وہ یتیم سے ہو گئے ہیں کیوںکہ وہ ان سے بہت زیادہ مانوس تھے۔
نثار کے مطابق وہ ملازمین کی ہر چھوٹی بڑی ضرورت کا بے حد خیال رکھتے تھے۔ اور وہ بہترین استاد تھے۔
