عسکریت پسندی چھوڑ دو، قومی دھارے میں واپس آؤ: جی او سی 15 کور

جنوبی کشمیر کے ضلع شوپیاں میں آج پندرہویں کور کے جنرل آفیسرکمانڈنگ دیوندر پرتاپ پانڈے اور انسپکٹر جنرل آف پولیس وجے کمار نے سرگرم عسکریت پسندوں کے والدین سے ملاقات کی۔ انہوں نے عسکریت پسندوں کے والدین سے اپیل کرتے ہوئے کہا کہ وہ اپنے بچوں کو عسکریت پسندی چھوڑنے کو کہیں۔

پولیس اور فوج کے اعلیٰ افسران نے منگل کو جنوبی کشمیر کے ضلع شوپیاں میں عسکریت پسندوں کے والدین سے بات چیت کی اور ان سے اپیل کی کہ وہ اپنے بچوں کو قومی دھارے میں واپس لائیں۔ جی او سی 15 کور اور آئی جی کشمیر نے شوپیاں میں پورے جنوبی کشمیر کے عسکریت پسندوں کے افرادِ خاندان سے بات چیت کی۔

اس دوران لیفٹیننٹ جنرل ڈی پی پانڈے اور آئی جی پی کشمیر وجے کمار نے عسکریت پسندوں کے والدین سے اپیل کی کہ' وہ اپنے بچوں کو قومی دھارے میں واپس لائیں جب کہ فوج اور پولیس انہیں ہر قسم کی مدد فراہم کریں گی۔'

جی او سی 15 کور لیفٹیننٹ جنرل ڈی پی پانڈے اور آئی جی پی کشمیر وجے کمار نے بٹہ پورہ شوپیان میں جنوبی کشمیر میں سرگرم عسکریت پسندوں کے والدین کے ساتھ ایک انٹرایکٹیو سیشن منعقد کیا۔

دونوں افسران نے عسکریت پسندوں کے خاندان کے افراد پر زور دیا کہ وہ اپنے بچوں سے تشدد کا راستہ ترک کرنے اور قومی دھارے میں شامل ہونے کی اپیل کریں، جب کہ پولیس اور فوج ان کی آسانی سے واپسی میں سہولت فراہم کرے گی۔

یہ پہلا موقع ہے کہ پولیس اور فوج کے دو سینیئر افسران نے جنوبی کشمیر میں عسکریت پسندوں کے والدین کے ساتھ اس طرح کی بات چیت کی ہے۔
اس دوران جی او سی 15 کور لیفٹیننٹ جنرل ڈی پی پانڈے نے بتایا کہ فوج انکاؤنٹر کے دوران اپنی جانیں دینے کے لیے تیار ہیں جب کہ فوج عسکریت پسندوں کی جانیں بچانے کی کوششیں بھی کررہی ہے۔