اکتیس مارچ تک مکمل لاک ڈاؤن اور غیر ضروری نقل و حمل پر انتظامیہ کی جانب سے عائد بندشوں کے پیش نظر وادی کشمیر کے سبھی اضلاع میں ہو کا عالم ہے۔
وادی کے سبھی اضلاع میں احتیاط کے طور سخت ترین بندشیں عائد کی گئی ہیں۔ اور سبھی اضلاع میں انتظامیہ کی جانب سے کووڈ 19 کے خطرات کے پیش نظر پابندیاں عائد کرنے کے احکامات صادر کئے ہیں۔
لوگوں کی نقل وحرکت محدود کرنے کے لیے شہر و دیہات کے داخلی اور خارجی راستوں کو بند کر دیا گیا ہے جبکہ جگہ جگہ پر ناکے لگا کر لوگوں کے چلنے پھرنے کے علاوہ نجی گاڑیوں کی آمدورفت پر بھی قندغنیں عائد کی گئی ہیں۔ تاہم اس فیصلے سے کئی لوگ انتظامیہ سے نالاں ہیں۔
وادی کے تمام اضلاع میں دکانیں، کاروباری اور تعلیمی ادارے بند اور پبلک ٹرانسپورٹ سڑکوں سے مکمل طور غائب ہے۔
کورونا وائرس کے پھیلنے کے خدشات کے پیش نظر پولیس اور انتظامیہ کی جانب سے ہر شہر ہر گلی میں اعلانات کے ذریعے لوگوں سے باہر نہ نکلنے، غیر ضروری ہجوم سے اجتناب کرنے کی اپیل بھی کی جا رہی ہے۔