سی اے اے اور این آر سی کی حمایت میں دیپانکر جی مہاراج کا پرامن احتجاج

سہارنپور کے دیوبند علاقہ میں جہاں ایک طرف مسلم سماج کے ذریعہ سی اے اے کے خلاف زبردست احتجاجی مظاہرے ہو رہے ہیں وہیں آج سی اے اے اور این آر سی کی حمایت میں بین الاقوامی دھیان گرو دیپانکر جی مہاراج کی قیادت میں دیوی کنڈ سے جی ٹی روڈ تک مارچ نکالا گیا اور اس کو وزیر اعظم کا بہتر قدم بتایا گیا۔

سوامی دیپانکر مہاراج نے کہا کہ یہ پرامن احتجاج سی اے اے اور این آر سی کی حمایت میں ہے اور ان لوگوں کے لیے ایک پیغام ہے جو اس قانون کے خلاف احتجاج کرکے تشدد پھیلا رہے ہیں۔ انہوں نے کہا کہ گاندھی جی نے کہا تھا کہ پڑوسی ریاستوں کے پریشان حال لوگوں کی مدد کرنا ہماری قومی ذمہ داری ہے۔

مولانا ابولکلام آزاد نے1946ءمیں کہا تھا کہ پاکستان سمیت تمام ممالک کے متاثرین کو ملک میں پناہ دی جائے۔ سنہ 2003 میں سابق وزیر اعظم منموہن سنگھ نے کہا تھا کہ جو لوگ بنگلہ دیش،افغانستان اور پاکستان میں پھنسے ہیں ان کو یہاں لایا جانا چاہیے۔ راجستھان کے وزیر اعلیٰ اشوک گہلوت نے بھی پناہ گزینوں کی مدد کی بات کہی تھی لیکن آج جب موجود وزیر اعظم نریندر مودی نے یہ قانون پاس کر دیا تو سب اس کی مخالفت کرنے لگے۔

انہوں نے مزید کہا کہ پر امن طریقہ سے احتجاج کر کے ہم اس قانون کی حمایت کر رہے ہیں اور تشدد پھیلانے والوں کو ایک پیغام دے رہے ہیں۔