رامسو میں تعمیراتی کمپنی کے خلاف احتجاج

جموں وکشمیر کے ضلع رامبن کے سب ڈویژن رامسو میں فورلین پروجیکٹ کی تعمیر کےلیے ذمہ دار تعمیراتی کمپنی کی جانب سے ضلع سے باہر کے مزدورو و سیکورٹی گارڈز کی بھرتی کے خلاف مقامی لوگوں نے احتجاج کیا ہے۔

مقامی لوگوں کا کہنا ہے کہ رامسو میں تعمیراتی کمپنی این ایچ آئی اے اور ایچ سی سی نے مقامی افراد کو روزگار فراہم کرنا چاہئے جبکہ کمپنی دیگر علاقوں سے مزدوروں کو سیکوریٹی گارڈ کو بھرتی کررہی ہے۔ انہوں نے کہا کہ کمپنی لیبر قوانین کی خلاف ورزی کرتے ہوئے کم اجرت بھی دے رہی ہے۔

مقامی لوگوں نے ضلع انتظامیہ رامبن سے اس معاملہ میں مداخلت کی اپیل کی ہے تاکہ علاقے کے بے روزگار افرد کو روزگار مل سکے۔ مقامی لوگوں نے ان کے مسئلے پر فوری طور پر کارروائی کا مطالبہ کیا ہے۔

وہیں بی ڈی سی چیرمین رامسو محمد شفیق کا کہنا ہے کہ قومی شاہراہ کی کشادگی کےلیے جاری تعمیراتی کام کے دوران رامسو میں عوام کا کاروبار ختم ہوگیا ہے۔ کٹائی کی وجہ سے سینکڑوں گھر تباہ ہوگئے اور تعمیراتی کمپنی مقامی لوگوں کو روزگار سے بھی محروم رکھنا چاہتی ہے جو ناقابل قبول ہے۔

انہوں نے انتظامیہ سے اس معاملے میں مداخلت کی اپیل کی ہے۔