Cloudburst: کشتواڑ کے دچھن میں بادل پھٹنے سے 7 افراد ہلاک، درجنوں لاپتہ

سرحدی ضلع کشتواڑ کے تحصیل دچھن کے ہنزل گاؤں میں بادل بھٹنے سے سات لوگ ہلاک جب کہ 40 سے زائد افراد لاپتہ ہیں۔

کشتواڑ کے دچن ہنزل میں دوران شب بادل پھٹنے سے سات افراد ہلاک جبکہ درجنوں لوگوں کے لاپتہ ہونے کی اطلاع ہے۔ بادل پھٹنے سے علاقے میں زبردست سیلاب آیا ہے جس میں سے کم از کم آٹھ مکانات کو نقصان پہنچا ہے۔ پولیس کے مطابق ابھی تک لاپتہ افراد کی صحیح تعداد معلوم نہیں ہوئی ہے۔

وہیں وزیر اعظم نریندر مودی نے ٹویٹ میں کہا کہ" کشتواڑ اور کرگل میں بادل پھٹنے کے بعد مرکزی حکومت صورتحال پر کڑی نظر بنائے رکھے ہے۔ متاثرہ علاقوں میں ہر ممکن مدد فراہم کی جارہی ہے۔ میں ہر ایک کی سلامتی اور خیریت کے لئے دعا گو ہوں۔"

اس حادثے کے بعد مرکزی وزیر داخلہ امت شاہ نے ٹویٹ کیا کہ "میں نے کشتواڑ (جموں و کشمیر) میں بادل پھٹنے کے بارے میں جموں و کشمیر کے ایل جی اور ڈی جی پی سے بات کی ہے۔ ایس ڈی آر ایف، فوج اور مقامی انتظامیہ امدادی کاموں میں مصروف ہیں۔ این ڈی آر ایف بھی وہاں پہنچ رہی ہے۔ ہماری ترجیح یہ ہے کہ زیادہ سے زیادہ زندگیاں بچائی جائیں۔ میں سوگوار خاندانوں سے اظہار تعزیت کرتا ہوں۔"

تازہ اطلاعات کے مطابق بادل پھتنے سےچھہ مکانوں اور ایک راشن ڈپو کو نقصان پہنچا۔ علاقے میں تقریباً 25-26 مقامی افراد لاپتہ ہیں۔ اب تک 05 افراد کی لاشیں برآمد کی گئی ہیں وہیں 12 زخمیوں کو اب تک بازیاب کرایا گیا ہے۔

کشتواڑ پولیس کے مطابق خبر ملتے ہی پولیس موقع پر پہنچی ہے اور ریسکیو آپریشن شروع کر دیا ہے۔ ریسکیو آپریشن میں فوج، مقامی افراد اور انتطامیہ کے لوگ بھی شامل ہیں۔

وہیں، مقامی لوگوں کے مطابق درجنوں لوگ گاؤں سے لاپتہ ہیں جن کو ابھی تک ریسکیو نہیں کیا گیا۔

ذرائع کے مطابق بتایا جاتا ہے کہ 5 افرد کی لاشیں برآمد کی گئی ہیں جس میں ایک ٹیچر اور ایک محکمہ فوڈ کا نائٹ چوکیدار اور دو مقامی افراد شامل ہیں۔
ایس ایس پی کشتواڑ کا کہنا ہے کہ ابھی تک حادثے کی پوری جانکاری نہیں ہے۔ مکمل تفصیلات ملنے کے بعد ہی میڈیا کو جانکاری دی جائے گی۔

ہم آپ کو بتادیں کہ مرکز کے زیر انتطام علاقہ لداخ کے ضلع کرگل میں بھی بادل پھٹنے کی اطلاع ہے۔ بادل پھٹنے سے ایک پن بجلی پروجیکٹ اور کچھ مکانات کو نقصان پہنچا ہے لیکن اس حادثے میں کسی جانی نقصان کی اطلاع نہیں ہے۔