گیا: پوجا پنڈالوں میں ویکسینیشن کیمپ کا اہتمام

گیا میں تہواروں کے موقع پر حالات اور ماحول کے لحاظ سے بیداری مہم اور پیغامات دینے کی روایت ہے۔ اس مرتبہ کورونا سے بچاؤ کے لیے ویکسینیشن مہم کے فروغ پر زور دیا گیا ہے۔ پچاس پوجا پنڈالوں کے پاس ویکسینیشن اور جانچ کیمپ لگائے گئے ہیں جہاں پر عقیدت مند پہلے ویکسین لگوائیں گے اور اس کے بعد پوجا پنڈال کی زیارت کریں گے۔

بہار کے ضلع گیا میں درگا پوجا کو معنی خیز طریقے سے منانے کے لئے پوچا پنڈالوں میں کووڈ ویکسینیشن اور جانچ کے انتظامات کیے گئے ہیں۔ ضلع انتظامیہ اور محکمۂ صحت نے ضلع کے پچاس مقامات پر پوجا پنڈالوں میں ویکسینیشن کیمپ بنایا ہے۔ ان میں شہر گیا میں پانچ اہم بڑے پوجا پنڈال بھی شامل ہیں، جن میں کیدار ناتھ مارکیٹ، مان پور پٹواٹولی، چاند چوراہا، ضلع اسکول اور اسٹیشن پر واقع پوجا پنڈال شامل ہیں۔

نعرہ دیا گیا ہے کہ " ویکسینیشن کے بعد ہی پوجا پنڈالوں کی کریں گے زیارت" یہاں دو این ایم، ایک ڈیٹا انٹری کرنے والا اسٹاف، ایک نگرانی کرنے اور جانچ کے لیے دو اسٹاف کو تعینات کیا گیا ہے۔

شہر گیا کے پانچ مقامات کے ساتھ پورے ضلع میں پچاس پوجا پنڈال ہیں۔ پوجا پنڈال میں کووڈ ویکسینیشن مہم کا پوسٹر بھی لگا ہے۔ وقتاً فوقتاً اس مہم کا اعلان بھی کیا جاتا ہے۔ کیدار ناتھ پوجا پنڈال کمیٹی کے ذمہ داروں نے بتایا کہ انتظامیہ کے تعاون سے جانچ اور ویکسینیشن کیمپ میں عقیدت مند پہنچ کر ویکسین لگوارہے ہیں، کسی کے ساتھ زبردستی نہیں ہے، تاہم ویکسینیشن کے فوائد کے تعلق سے جانکاری ضرور دی جارہی ہے۔


ضلع گیا کے سول سرجن ڈاکٹر کمل کشور نے کہا کہ لوگوں کو کورونا سے محفوظ رکھنے کی ضرورت ہے۔ پوجا پنڈال میں ویکسینیشن کے لیے خصوصی انتظامات کیے گئے ہیں، پہلے اور دوسرے ڈوز دونوں حاصل کرسکتے ہیں۔

واضح رہے کہ ضلع گیا میں اب تک 59 فیصد لوگوں کو ہی ویکسین کی پہلی ڈوز لگی ہے، حال کے کچھ دنوں میں ویکسینیشن کی رفتار کم ہوئی ہے جو اچھے آثار نہیں ہیں، تاہم پنڈالوں کے پاس کیمپ لگانے سے تشہیر کی مہم کو مدد ملے گی۔