'بہار: سڑک اور پل تعمیرات کی زیرالتوا پروجیکٹ جلد مکمل ہوں'

صنعت اور تجارتی تنظیم بہار چیمبر آف کامرس اینڈ انڈسٹریز (بی سی سی آئی) نے کورونا وبا کی وجہ سے سست پڑی اقتصادی سرگرمیوں میں تیزی لانے کے مقصد سے حکومت سے شمالی اور جنوبی بہار کے درمیان اشیا کی سپلائی اور آسان نقل و حرکت کو یقینی بنانے کے لیے سڑک اور پل تعمیرات کے زیرالتوا پروجیکٹوں کو جلد مکمل کرائے جانے کی درخواست کی۔

بی سی سی آئی کے صدر پی کے اگروال نے سنیچر کو کہا کہ پٹنہ کے گاندھی سیتو کے مغربی لین کا کام مکمل ہونے سے کاروباریوں کو راحت ملی ہے۔ اس کے افتتاح کے موقع پر بہار کے لئے اعلان شدہ دیگر بڑے پروجیکٹوں جیسے گاندھی سیتو کے متوازی پل اور گنگا ندی پر دیگر پل کے ساتھ ساتھ ریاست کی مختلف سڑکوں کو فور لین میں تبدیلی حکومت کا قابل خیرمقدم قدم ہے۔ا س سے ریاست کے لوگوں کو فائدہ ہوگا لیکن اس کے مکمل ہونے میں پانچ سے دس برس کا وقت لگے گا۔

مسٹر اگروال نے مرکزی اور ریاستی حکومت سے درخواست کی کہ اگر ان پروجیکٹوں کو جلد مکمل کرایا جائے تو بہار کے لوگوں کو فوری طور پر راحت ملنے لگے گی وہیں کووڈ کی اس مشکل حالت میں شمالی بہار اور جنوبی بہار کے درمیان کاروباری سرگرمیوں میں تیزی آئے گی۔ انہوں نے کہاکہ موکاما میں گنگا ندی پر واقع راجندر سیتو ٹرین و سڑک پل کے روڈ ڈیک کی بلاتاخیر مرمت و تزئین آرائش کا کام ہندستانی ریلوے یا کسی دیگر ٹھیکیدار کے ذریعہ کرایا جانا چاہئے۔