نتیش کمار نے رام دیو رائے کے انتقال پر اپنے رنج وغم کا اظہار کیا

بہار کے وزیراعلی نتیش کمار نے سابق وزیر اور بچھواڑا سے موجودہ رکن اسمبلی رام دیو کے انتقال پر اپنے گہرے رنج وغم کا اظہار کیا ہے۔

مسٹر نتیش کمار نے سنیچر کو یہاں اپنے تعزیتی پیغام میں کہا کہ’’"مسٹر رائے ایک تجربہ کار سیاستداں اور مشہور سماجی کارکن تھے۔ ان کی طبیعت میں انکساری تھی۔ بہار کی سیاست میں ان کا ایک اہم کردار رہا ہے جسے فراموش نہیں کیا جاسکتا۔ میں ذاتی طور پر ان کے انتقال سے غمزدہ ہوں۔ ان کے انتقال سے سیاسی اور معاشرتی شعبوں کو ناقابل تلافی نقصان پہنچا ہے۔"
آنجہانی رائے کی آخری رسومات کے لئے پروٹوکول کے تحت پٹنہ اور بیگوسرائے ضلع انتظامیہ کو ضروری کارروائی کرنے کی ہدایت دے دی گئی ہے۔
وزیراعلیٰ نے آنجہانی کی روح کی شانتی اور ان کے اہل خانہ اور شائقین کو دکھ کی اس گھڑی میں صبر و تحمل کی طاقت عطا کرنے کی خدا سے دعا کی۔