بھاگلپور کے سنیئر پولیس سپرنٹنڈنٹ آشیش بھارتی نے سموار کو یہاں بتایا کہ ضلع کے کہلگاﺅں اسمبلی حلقہ سے کانگریس امیدوار شبھا نند مکیش اور بھارتیہ جنتا پارٹی ( بی جے پی ) امیدوار پون کمار یادو کے ذریعہ پرچہ داخل کرنے کے دوران سماجی دوری کو نظر انداز کر کے بغیر ماسک کے بھیڑ جمع کرتے ہوئے مثالی ضابطہ اخلاق کی خلاف ورزی کی گئی ہے ۔
اس معاملے میں کہلگاﺅں کے اسسٹنٹ سب ڈویژنل افسر شمبھو پرساد سنگھ نے دونوں امیدوار اور ان کے حامیوں کے خلاف مقامی تھانے میں ایف آئی آر درج کرائی ہے۔
یہ بھی پڑھیں:
مسٹر بھارتی نے بتایا کہ اسی طرح تارا پور تھانہ علاقہ کے مسلم ہائی اسکول کے نزدیک سرکاری بجلی پول پر بہوجن مکتی پارٹی کے امیدوار سہیندر پرساد ساہو کا پوسٹر بغیر اجازت کے غیر قانونی طور سے لگایا گیا تھا ۔جسے جگدیش پور کے سرکل افسر سنجیو کمار نے موقع سے ضبط کیاہے اور مذکورہ امیدوار کے خلاف مثالی ضابطہ اخلاق کی خلاف وزری کا معاملہ مقامی تھانے میں درج کرایا ہے ۔
سنیئر پولیس سپرنٹنڈنٹ نے بتایا کہ ضلع میں نظم ونسق اور کووڈ۔19 کے لئے مرکزی الیکشن کمیشن کے ذریعہ رہنما اصول پر سختی سے عمل آوری کیلئے تھانہ صدور کو ضروری ہدایتیں دی گئی ہیں۔
