بہاراسمبلی انتخابات کی سرگرمی تیز

اس بار بہار اسمبلی انتخابات کے دوران کورونا کی وجہ سے جسمانی فاصلے کے پیش نظر پولنگ مراکز کی تعداد میں اضافے کا امکان ہے، یہ بھی ممکن ہے کہ سات سو سے نوسو ووٹرز پرایک پولنگ مرکز قائم کیا جائے گا۔

بہاراسمبلی انتخابات 2020 کی تیاریوں کا ضلع سطح پر آغاز ہوچکا ہے، اس ضمن میں ضلع الیکشن افسر کم ضلع مجسٹریٹ نے حکام کو تیاری کرنے کاحکم جاری کیا ہے۔

ضلع الیکشن افسر کے مطابق بہار میں اسمبلی انتخابات وقت پر منعقد ہوں گے، پندرہ جون سے ووٹر لسٹ پر نظرثانی کا کام شروع ہوگا، بہار اسمبلی انتخابات کی تیاریوں میں ضلع انتظامیہ مصروف عمل ہے، ضلع الیکشن افسر ابھشیک کمار سنگھ اور ایس ایس پی راجیومشرا نے اس ضمن میں میٹنگ کر کے افسران کو ضروری ہدایات دی ہیں۔

میٹنگ کرتے افسران

میٹنگ میں ضلع الیکشن افسر نے تمام ریٹرننگ آفیسر اور اسسٹنٹ ریٹرننگ آفیسر کوہدایت دی ہے کہ بہار اسمبلی انتخابات کے دوران آر او ، اے آر او کا کردار اہم ہوجاتا ہے۔

انہوں نے کہا کہ اس بار بہار اسمبلی انتخابات میں کورونا کی وجہ سے جسمانی فاصلے کے پیش نظر پولنگ مراکز کی تعداد میں اضافے کا امکان ہے، یہ بھی ممکن ہے کہ سات سو سے نوسو ووٹرز پرایک پولنگ مرکز قائم کیا جائے گا، لہذا تمام بلاکس افسران اپنے اپنے علاقوں میں دستیاب تمام سرکاری عمارتوں کے ساتھ ساتھ نجی عمارتوں کا سروے کریں۔

اسکولز اور آئی ٹی آئی عمارتوں کی بھی نشاندہی کی جانی چاہئے، عمارت میں کمروں کی تعداد اور عمارت کس حالت میں ہے اس کے بارے میں ایک رپورٹ تیار کی جانی چاہئے۔

انہوں نے کہا کہ اگر کسی عمارت میں پہلے سے پولنگ مرکزہے اور اسکو کسی دوسری جگہ منتقل کرنا ہے تو ایسی صورتحال میں دوسری عمارت پانچ سو میٹر سے زیادہ دور نہیں ہو اور اس سے قبل متعلقہ ایس ڈی او خود جاکر مرکز کا معائنہ کریں گے۔

انہوں نے ڈپٹی الیکشن آفیسر کو ہدایت کی کہ وہ اگلے چار ماہ کے لئے انتخابی کیلنڈر تیار کریں، اس کے علاوہ تمام اسمبلی حلقوں کے انتخابی افسران سے فارم چھ، سات اور آٹھ کی حیثیت کا جائزہ لیں۔

ڈپٹی الیکشن آفیسر نے بتایا کہ ووٹر لسٹ کی نظر ثانی کا کام 15 جون سے شروع کیا جانا ہے، جس پر ضلع الیکشن افسر نے ہدایت دی کہ بلاکس افسران اپنے بی ایل اوز کو فعال کریں اور ان کے ساتھ میٹنگ کریں۔