نوئیڈا: ’کووِڈ19 کے خلاف سرویلنس ورک کا کلیدی رول‘

ریاست اتر پردیش کے نوئیڈا علاقے میں منعقدہ ایک میٹنگ میں شہریوں کو تحفظ فراہم کرنے میں سرویلنس ورک کو اہم اور کلیدی قرار دیا گیا۔

ریاست اتر پردیش میں عالمی وبا کووِڈ19 کے پیش نظر گریٹر نوئیڈا اتھارٹی کے آڈیٹوریم میں ایک اہم اجلاس طلب کیا گیا۔

اجلاس کے دوران نوڈل آفیسر نریندر بھوشن نے کہا کہ ’’کورونا وائرس کے انفیکشن سے شہریوں کو تحفظ فراہم کرنے میں سرویلنس ورک کا اہم کردار ہے۔ لہٰذا تمام متعلقہ افسران کی جانب سے (سرویلنس ورک) نگرانی کے کام کو پوری شدت کے ساتھ مکمل کرنے کے لئے کارروائی کی جانی چاہئے تاکہ کورونا وائرس سے متاثرہ شہریوں کی نشاندہی کرکے ان کو قرنطین کیا جا سکے۔‘‘

انہوں نے یہ بھی کہا کہ کووِڈ19 سے متعلق دیگر سرگرمیاں بھی متعلقہ افسران کے ذریعہ وقتی طور پر انجام دی جانی چاہیے تاکہ ضلع کے باشندوں کو کورونا وائرس کے انفیکشن سے بچایا جا سکے۔

نوڈل افسر نے مزید کہا کہ لاک ڈاؤن کے دوران ہاٹ اسپاٹ علاقوں میں تمام شہریوں کو ضروری سامان، پھل، سبزیاں اور دوائیوں کی فراہمی یقینی بنی رہے اس کے لئے متعلقہ افسران کے ذریعے مستقل جائزہ بھی لیا جائے۔

اس موقع پر انہوں نے یہ بھی کہا کہ کووِڈ19 کے پیش نظر تمام افسران کو باہمی تال میل قائم کر کے مستقل طور پر کام کرنا ہوگا تاکہ ضلع کے رہائشی اس عالمی وبا سے محفوظ رہ سکیں۔

میٹنگ میں ڈسٹرکٹ مجسٹریٹ سہاس ایل وائی، پولیس کمشنر آلوک سنگھ، نوئیڈا ڈیولپمنٹ اتھارٹی کے چیف ایگزیکٹو آفیسر ریتو مہیشوری، چیف میڈیکل آفیسر ڈاکٹر دیپک اوہری اور دیگر متعلقہ افسران موجود تھے۔