انسانی حقوق کمیشن کا نوئیڈا پولیس کو نوٹس

قومی انسانی حقوق کمیشن سے نوئیڈا پولیس کے خلاف شکایت کی گئی تھی جس میں کہا گیا تھا کہ احتجاجی کسانوں کو بغیر مقدمہ درج کیے پولیس نے جیل بھیج دیا، جس پر کمیشن نے نوئیڈا پولیس کو نوٹس جاری کیا ہے۔

اترپردیش میں یکم ستمبر سے نوئیڈا اتھارٹی کے خلاف احتجاج کر رہے کسانوں کو جیل بھیجنے کے معاملے میں قومی انسانی حقوق کمیشن نے نوئیڈا پولیس کو نوٹس بھیجی ہے۔ کمیشن نے پولیس کمشنر کو بھیجے گئے اپنے نوٹس میں پورے معاملے پر اندرون 4 ہفتہ جواب طلب کیا ہے جبکہ کمیشن نے پورے معاملے کو حساس اور تشویشناک قرار دیتے ہوئے بتایا کہ پولیس کے خلاف الزامات انتہائی سنگین نوعیت کے ہیں۔

اطلاعات کے مطابق سینکڑوں کسانوں کو مقدمہ درج کیے بغیر غیرقانونی طور پر جیل بھیج دیا گیا جس سے انسانی حقوق کی خلاف ورزی ہوتی ہے۔ نوئیڈا پولیس کی اس کاروائی پر این ایچ آر سی نےنوٹس روانہ کیا۔

واضح رہے کہ 81 دیہات کے ہزاروں کسانوں نے یکم ستمبر کو اتھارٹی آفس کے باہر احتجاجی مظاہرہ کیا تھا جس کے بعد نوئیڈا پولیس نے 104 کسانوں و دیگر سیاسی رہنماوں کو حراست میں لیا تھا اور بعد میں انہیں جیل بھیج دیا گیا۔ گرفتاری سے متعلق معلومات افراد خاندان اور وکلاکو بھی فراہم نہیں کی گئی۔ کسان رہنما سکھبیر خلیفہ کے ایڈوکیٹ سچن اوانا نے پورے معاملے سے قومی انسانی حقوق کمیشن کو واقف کروایا۔ شکایت کا نوٹ لیتے ہوئے کمیشن نے نوئیڈا پولیس کمشنر آلوک سنگھ کو نوٹس بھیجا ہے۔