نوئیڈا: ضلع پولیس اور غیر سرکاری تنظیم کی جانب سے مفت راشن تقسیم

نوئیڈا میں لاک ڈاون کے دوران ضرورت مند افراد میں ضلع پولیس اور غیر سرکاری تنظیم کی جانب سے مفت راشن تقسیم کیا گیا۔

ریاست اترپردیش کے نوئیڈا علاقے میں ضلع پولیس اور چیتنا سنستھان نامی ایک غیر سرکاری تنظیم کی جانب سے سیکٹر 126 ، سیکٹر 52 ، صرف آباد ۔ سیکٹر 16 ، ہرولا ، سیکٹر 18 کے ضرورت مند خاندانوں میں راشن اور اشیائے خورد ونوش تقسیم کی گئی۔

ہر راشن کٹ میں آٹا، دالیں، چاول، چینی، تیل، مصالحہ جات موجود تھے۔ راشن کی تقسیم کے نظام میں حکومت کی طرف سے مقرر کردہ تمام سماجی فاصلاتی ہدایات پر سختی سے عمل کیا گیا۔

نوئیڈا پولیس انچارج اور پولیس اہلکاروں نے تمام احتیاطی تدابیر اور حفاظت کے ساتھ راشن تقسیم کیا۔

اس موقعے پر چیتنا سنستھا کے ڈائریکٹر سنجے گپتا نے معاشرے کے تمام اسٹیک ہولڈرز سے اپیل کی کہ وہ ’’لاک ڈائون اور مشکل دور میں سلامتی اور احتیاط کے ساتھ ایسے کام کرکے ضرورت مند اور حاجت مند خاندانوں کی مدد کے لیے آگے آئیں۔‘‘