مرکزی حکومت پر شرد پوار چراغ پا

شیوسینا رکن اسمبلی کے خلاف ای ڈی کے ذریعہ کی گئی کاروائی پر شرد پوار نے کہا کہ ریاست میں بی جے پی کو دوبارہ اقتدار حاصل کرنے کے لئے ای ڈی نے یہ کارروائی کی ہے۔

ای ڈی کے ذریعہ شیوسینا کے ایم ایل اے پرتاپ سرانائک کے گھر اور دفتر پر چھاپہ ماری کی کاروائی پر این سی پی کے سپریمو اور سینئر رہنما شرد پوار نے اپنے رد عمل کا اظہار کرتے ہوئے کہا کہ ’لوگوں کے سوالوں کے جواب دینے کے بجائے سیاسی مخالفین کے خلاف حکومتی تحقیقاتی میکانزم کا استعمال کیا جا رہا ہے۔ انہوں نے کہا کہ ریاست میں بی جے پی کو دوبارہ اقتدار حاصل کرنے کے لئے ای ڈی نے یہ کارروائی کی ہے۔ ریاست مہاراشٹر میں فی الحال جو کچھ ہورہا ہے وہ اپوزیشن کی مایوسی کی علامت ہے۔ یہ ٹھیک نہیں ہے کہ حزب اختلاف کے خلاف حکومتی تحقیقاتی میکانزم استعمال ہورہے ہیں۔ شرد پوار نے تنقید کرتے ہوئے کہا کہ مرکز میں طاقت کا غلط استعمال کیا جارہا ہے کیونکہ وہ سمجھ گئے ہیں کہ عوام انہیں دوبارہ اقتدار نہیں دیں گے۔

مہاوکاس آگھاڑی عوام الناس کو تمام تر سہولیات کے ساتھ ان کی ترقی نیز سب کو ساتھ میں لے کر چلنے کے لئے کوشاں ہے۔ ہمارے اتحاد میں شامل تمام پارٹیوں کو اعتماد میں لے کر کام کر رہے ہیں۔
بی جے پی کے لیڈر راؤ صاحب دانوے کے اس بیان پر کہ ’’ریاست میں تین ماہ میں بی جے پی کی حکومت آئے گی۔‘‘ کے جواب میں شرد پوار نے کہا کہ میں نہیں جانتا تھا کہ راؤصاحب دانوے علم نجوم کے کتنے ماہر ہیں۔ پوار نے طنز کرتے ہوئے کہا کہ راؤ صاحب رکن پارلیمنٹ ہیں اور گذشتہ کئی برسوں سے عملی سیاست میں ہیں لیکن میں ان کی اس خوبی سے واقف نہیں تھا کہ وہ علم نجوم کے بھی ماہر ہیں۔ انہیں سیاست میں کبھی بھی نجومی کے طور پر نہیں جانا جاتا تھا لیکن آج مجھے معلوم ہوا کہ ان میں یہ مہارت بھی ہے۔